Саха сирин киин куоратыгар — Туймаада Ыһыаҕа

Бэс ыйын 29 күнүгэр Туймаада Ыһыаҕын арыллыыта буолла. Киэҥ хабааннаах төрүт бырааһынньыкпыт «Азия оҕолоро» норуоттар икки ардыларынааҕы спортивнай оонньуулар кэмнэригэр ыытыллар. Быйыл Саха сиригэр Оҕо сылыгар уонна Арассыыйаҕа Дьиэ кэргэн сылыгар ананар.

Ыалдьыттары уонна олохтоохтору Саха сирин Ил Дархана Айсен Николаев истиҥник эҕэрдэлээтэ.»Бүгүн Саха сиригэр норуоттар икки ардыларынааҕы таһымнаах үгүс тэрээһиннэр буолаллар уонна саамай сүрүннэрэ, биллэн турар, «Азия оҕолоро» VIII норуоттар икки ардыларынааҕы спортивнай оонньуулар, атын дойдулар уонна эрэгийиэннэр бэрэстэбиитэллэрин түмтэ. Биһиги алгыспыт, Ыһыах ыалдьыттарбытыгар биһиги дойдубутун, култуурабытын, улуу дойдубутун, эйэҕэ уонна үтүөҕэ дьулуһуубутун көрдөрөр»,— диэтэ өрөспүүбүлүкэ Ил Дархана.

«Уон хонуктааҕыта биһиги Бэрэсидьиэммит Владимир Владимирович Путин Дьокуускайга кэлэ сылдьыбыта. Кини биһиги социальнай-экэнэмиичэскэй сайдыыга былааммытын, кэнники сылларга ыыппыт үлэбитин бигэргэппитэ уонна өрөспүүбүлүкэбит олус күүскэ сайдарыттан, саҥа айар индустриялартан сөхпүтэ»,— диэтэ Айсен Николаев.

Кини Саха сирин олохтоохторугар өрөспүүбүлүкэни салайарыгар итэҕэллэрин иһин махтанна уонна өссө күүскэ сайдыахпыт диэн эрэннэрдэ. «Алгыспыт Аҕа дойдубут туһугар туруулаһар биһиги уолаттарбытыгар көмөлөстүн. Кинилэр кыайыы көтөллөөх этэҥҥэ дойдуларыгар эргилинниннэр«,— диэтэ.

Саха сирин олохтоохторугар эҕэрдэтин Арассыыйа Олимпийскай кэмитиэтин бэрэсидьиэнэ Станислав Поздняков тиэртэ. «Бүгүҥҥү бырааһынньык «Азия оҕолоро» норуоттар икки ардыларынааҕы оонньуулар кэмнэригэр ыытыллара бэлиэ түгэнинэн буолар. Манна 24 дойду спортсмена кыттар. Хардарыта өйдөһүү, эйэ уонна доҕордоһуу эйгэтигэр күүстээхтэри быһаарабыт. Манна аҕам саастаахтарга, оҕолорго, төрүт үгэстэргэ ытыктабыллаах сыһыан баар«, — диэтэ кини.

Арассыыйа Федерациятыгар Бахрейн Королевствотын боломуочуйалаах посола Ахмед Абдулрахман Махмуд Исмаил Аль-Саати эҕэрдэлээтэ, кини бэйэтин хамаандатын күрэхтэһиилэргэ өйүү кэлбит. Кини өрөспүүбүлүкэҕэ кэлиитин биир сыалынан Бахрейн Королевствотын уонна Саха Өрөспүүбүлүкэтин икки ардыларыгар култуура, экэниэмикэ уонна атын хайысхаларга сыһыаны олохтооһун буолар, итиэннэ Арассыыйа Бэрэсидьиэнигэр Владимир Владимирович Путиҥҥа, СӨ Ил Дарханыгар истиҥ махталын тириэртэ, Саха сирин олохтоохторун национальнай бырааһынньыгынан эҕэрдэлээтэ.

Национальнай бырааһынньык бочуоттаах ыалдьыттарынан Судаарыстыбаннай Дуума дьокутаата Николай Валуев, Башкортостан Судаарыстыбаннай Мунньаҕын — Курултай бэрэссэдээтэлэ Константин Толмачев, Хотугу Осетия парламенын бэрэссэдээтэлэ Таймураз Тускаев, Азия Олимпийскай сэбиэтин толоруулаах кэмитиэтин чилиэнэ Наталья Сипович, Кытай Норуодунай Өрөспүүбүлүкэтин Хабаровскай куоракка генеральнай консулун бастакы солбуйааччы хотун Лю Ян кытыннылар.
Арыйыы сиэригэр Арассыыйа Федерациятын Дьоруойдара Александр Колесов, Филипп Евсеев, Алексей Неустроев кытыннылар.
99 ытык сэргэҕэ Алгыс сиэрэ-туома буолла.
«Азия оҕолоро» норуоттар икки ардыларынааҕы оонньууларынан сибээстээн үрүҥ көмүс «Ытык дуоҕа» штандартын Дьокуускай баһылыгар Евгений Григорьевка II оонньуулар кыайыылаахтара, мас-рестлиҥҥэ чөмпүйүөн Систир Алексеев туттарда.
Аһыллыы сиэрин-туомун кэнниттэн оһуохай буолла.