Саха сирин кикбоксердара Арассыыйа чөмпүйэнээтин призердарынан буоллулар

Саха сирин кикбоксиҥҥа сүүмэрдэммит хамаандата Арассыыйа чөмпүйэнээтигэр түөрт боруонса мэтээли ылары ситистэ. Дойду сүүмэрдэммит хамаандатын састаабыгар сүүмэрдиир күрэхтэһии Каспийскайга ыытылынна диэн «Триумф» успуорт комплекса иһитиннэрэр.

К-1 дисциплинаҕа пьедестал үһүс түһүмэҕэр Айтал Петров (71 кг) таҕыста. Бу күрэхтэһии түмүгүнэн кини Арассыыйа успуордун маастара буолар кыахтанна, докумуоннарын ыытара эрэ хаалла.

Маны сэргэ лоу-кик көрүҥҥэ боруонса мэтээллэри Спиридон Антонов (51 кг), Станислав Румянцев (57 кг) уонна Адулай Хуцуруев (91 кг) ылары ситистилэр.