Салгыы
Саха сирин кыраныыссатын бэлиэтэ норуот көҕүлээһининэн тутулунна

Саха сирин кыраныыссатын бэлиэтэ норуот көҕүлээһининэн тутулунна

07.11.2022, 18:13
Бөлөххө киир:

Бэҕэһээ, сэтинньи 6 күнүгэр, Саха сирин соҕуруу кыраныыссатыгар «Саха сирэ-Якутия» диэн бэлиэни үөрүүлээх быһыыга-майгыга астылар.

Бу туһунан өрөспүүбүлүкэтээҕи Землячестволар түмсүүлэрин салайааччытын солбуйааччы, Горнай улууһуттан төрүттээх биир дойдулаахтар  түмсүүлэрин салайааччыта Надежда Федорова сырдатта:

— Норуот стелатын тутуутун бырайыагын көҕүлээччи —  өрөспүүбүлүкэтээҕи Землячестволар түмсүүлэрин сэбиэтин чилиэнэ, Кэбээйи улууһуттан төрүттээхтэр түмсүүлэрин салайааччыта Руслан Михайлов.

Кини доҕоро Ньургун Сидоров былырыын дьиэ кэргэнин кытта Саха сирин кыраныыссатын бэлиэтин аттыгар хаартыскаҕа түһэн ыытан баран, «Саха дьоһун уолаттара» батсаап бөлөҕөр: «Тоҕо биһиги кыраныыссабыт маннык хобдоҕуй?» диэн хомолтотун биллэрэн суруйбут.

Ол хаартысканы көрөн баран, Руслан Михайлов Саха АССР 100 сылыгар анаан кыраныысса бэлиэтин — тупсаҕай көстүүлээх стела оҥорорго санаммыт. Бырайыагы толкуйдаат, оробуочай бөлөх тэринэн, бу тутууга кыттыһыан баҕалаах дьону хомуйбуттар. Норуот стелатын тутууга уопсастыбанньыктар, урбаанньыттар кыттыспыттар.  Бырайыак тутуутун сүрүн спонсордарынан: «ТСС+» ХЭУо салайааччыта  Ньургун Сидоров, «Агенство инвестиционных решений» ХЭУо салайааччылара Павел Васильев, Николай Калитин буолбуттар.  Үтүө дьыалаҕа кыттыспыт дьон ааттарын көстүүлээх  сиргэ үйэтиттилэр.

«Сахапромснаб» АНО салайааччыта, «Саха дьоһун уолаттара» түмсүү түһэ, бырайыагы көҕүлээччи Руслан Михайлов тустаах министиэристибэлэри түмэ тарпыта. Ол курдук, тырааныспар уонна суол хаһаайыстыбатын миниистирэ Владимир Сивцев, тас сыһыаннаһыылар уонна норуоттар дьыалаларын миниистирэ Гаврил Кириллин, «Нерюнгри оройуона» МО баһылыга Роман Щегельняк, «Лена» федеральнай айан суолун агенствотын  «Невер-Дьокуускай» автомобильнай магистраль управлениетын салайааччыта Алексей Бубнов норуот стелата тутуллуутугар сүҥкэн көмөнү оҥорбуттарын Руслан Михайлов махтана ахтар.

… Ити курдук, хантан хаһан үбүлээһин көстөрүн кэтэспэккэ-манаабакка, уопсастыбанньык тус бэйэтэ көҕүлээн,  Саха сирин Арассыыйа эригийиэннэрин кытта ыкса сибээстиир олус улахан суолталаах кыраныысса бэлиэтин оҥорторон,  бэртээхэй норуот стелата баар буолла. Ийэ дойдуга бэриниилээх буолуу бастыҥ холобурун көрдөбүт Руслан Михайловка саха дьоно махтаныахтарын махтаналлар.

Хаартыска — Надежда Федорова тиксэриитэ.

Бары сонуннар
Салгыы
9 февраля
  • -46°C
  • Ощущается: -46°Влажность: 65% Скорость ветра: 0 м/с

Сообщить об опечатке

Текст, который будет отправлен нашим редакторам: