Саха сирин кыргыттара Бүтүн Арассыыйатааҕы дронунан күрэхтэһиигэ бастакы мэтээллэрин ыллылар

СӨ Бырабыыталыстыбатын бэрэссэдээтэлин солбуйааччыта Анатолий Семенов эрэгийиэн эдэр күрэсчит кыргыттарын чаҕылхай ситиһиилэрин туһунан бэйэтин ТГ-ханаалыгар иһитиннэрдэ. Саха сирин кыргыттара өрөспүүбүлүкэ устуоруйатыгар аан бастаан Москва мэрин Куубагар дрон күрэһин тэхиниичэскэй симуляторыгар үс мэтээлгэ тигистилэр.

Бочуоттаах үһүс миэстэни араас категорияларга ыллылар:

• Сутакова Сардаана — биирдиилээн киирсиигэ, «Юниоркалар» саастарынан бөлөххө;
• Сутакова Сардаана уонна Антоева Уйгулаана — хамаанданан киирсиигэ, «Юниордар» саастарынан бөлөххө;
• Сутакова Сардаана уонна Антоева Уйгулаана — хамаанданан киирсиигэ, «Дьахталлар» саастарынан бөлөххө.

Уйгулаана Арктическай оскуолаҕа, оттон Сардаана Нам 1 №-дээх орто оскуолатыгар үөрэнэллэр. Кыргыттар үрдүк таһымнаах бэлэмнэрин көрдөрөн, уустук сүүмэрдэһини ситиһиилээхтик аастылар. Күрэхтэһии финалыгар биирдиилээн киирсиигэ 8 күрэсчит, хамаанданан – 4 хамаанда тахсыбыт, оттон сүүмэрдиир түһүмэхтэргэ дойду бары муннугуттан 472 күрэсчит кыттыбыт.

«Бу биһиги дрон күрэһин Бүтүн Арассыыйатааҕы успуорт күрэхтэһиилэригэр бастакы мэтээллэрбит уонна саха успуордун устуоруйатыгар саҥа страницаны арыйар. Биһиги кыргыттарбытын чаҕылхай ситиһиилэринэн эҕэрдэлиибин уонна кинилэргэ инникитин өссө үгүс кыайыыны баҕарабын!» — диэн СӨ Бырабыыталыстыбатын бэрэссэдээтэлин солбуйааччыта Анатолий Семенов бэлиэтээтэ.