Саха сирин марафонецтара Арассыыйа чөмпүйэнээтигэр бэлэмнэр

Атырдьах ыйын 30 күнүгэр Дьокуускайга 100 км сүүрүүгэ Арассыыйа чөмпүйэнээтэ ыытыллыаҕа. Киин куоракка дойду бастыҥ марафонецтара күрэхтэһэ кэлиэхтэрэ. Саха сирин  сүүмэрдэммит хамаандата бэлэм диэн СӨ Сүүмэрдэммит хамаандаларын бэлэмниир киин иһитиннэрэр.

Марафонецтар Ленин проспегынан сүүрүөхтэрэ. Сүүрүүнү интэриэһиргиир дьон ыалдьа кэлиэхтэрин сөп. Күрэхтэһии атырдьах ыйын 30 күнүгэр сарсыарда 7 чаастан Өрөспүүбүлүкэ болуоссатыттан саҕаланыаҕа.

Саха сирин хамаандатыттан норуоттар икки ардыларынааҕы кылаастаах маастар, дойду чөмпүйүөнэ Надежда Бут, Арассыыйа успуордун маастардара Роман Алексеев, Александр Моедо, Самуил Семенов, Эдуард Дьяконов, успуорт маастарыгар хандьыдаат Леонид Зыков сүүрүөхтэрэ. Итиэннэ инникилээх сүүрүүктэргэ — Саргылаана Лугиноваҕа уонна Татьяна Артемьеваҕа эрэл улахан.

Сарсын, атырдьах ыйын 30 күнүгэр, Дьокуускай үс улахан старт буолар — дойду чөмпүйэнээтэ, Саха сирин чөмпүйэнээтэ уонна Олоҥхо марафон. Дьокуускай устун 1800 спортсмен сүүрүөҕэ.