Саха сирин мусульманнара байыастарга көмө оҥордулар

Саха сириттэн дэлэгээссийэ байыаннай дьайыы зонатыгар байыастарга гуманитарнай көмөнү тиэртилэр, диэн «Ислам в Якутии» ТГ-ханаал иһитиннэрэр.

«Биһиги айаммыт Национальностар дьыалаларын федеральнай ааҕыныстыбатын тэрийиитинэн, Норуот сомоҕолоһуутун күнүгэр анаммыт аахсыйа чэрчитинэн ыытылынна. Байыаннай полигоҥҥа сырыттыбыт, Саха сирин олохтоохторо хомуйбут гуманитарнай көмөнү туттардыбыт», — диэн Саха сирин мусульманнарын Духуобунай-салайар управлениетын муфтийын солбуйааччы Нурудин Нурудинов кэпсээтэ.

Аахсыйа тэрийээччилэринэн эрэгийиэн араас омук общиналарын бэрэстэбиитэллэрэ, ону тэҥэ  Норуоттар доҕордоһууларын дьиэтэ буоллулар. Көрсүһүү кэмигэр буойуттар Саха сирин олохтоохторугар өйөбүл уонна сомоҕолоһуу иһин махталларын тиэртилэр.

«Дьокуускайтан биһигини өйүү кэлбит мусульманнар Духуобунай-салайар управлениетыгар улахан махталбытын тиэрдэбит. Биһиги манна сомоҕолоһобут, эһиги өйөбүлгүтүн билэбит уонна хас биирдиигитигэр махтанабыт! Бигэ эрэллээхпит – Кыайыы биһиэнэ буолуоҕа!», — диэн байыастар эттилэр. Тэрийээччилэр маннык өйөбүл буойуттар сүргэлэрин көтөҕөрүн, Арассыыйа уопсастыбатын сомоҕолоһуутун күүһүрдэрин бэлиэтээтилэр.

«Бүтүн дэлэгээссийэ аатыттан биһиги өрөспүүбүлүкэбит бырабыыталыстыбатыгар, Тас сибээстэргэ уонна норуоттар дьыалаларыгар министиэристибэтигэр уонна тирэх пууҥҥа тэрээһини ыытыыгы  өйөбүл уонна көмө иһин туспа махталбын тиэрдиэхпин баҕарабын. Эһиги күүскүтүнэн сырыы кыаллар буолла уонна дьиҥнээхтик суолталаах оҥордо», — диэн омук гражданнарын адаптациялааһын киинин салайааччыта Давид Архан эттэ.