Саха сирин оҕолоро байыаннай эпэрээссийэ кыттыылаахтарыгар суруйаллар

Саха сирин  оҕолоро, ыччаттара Аҕа дойдуну көмүскээччи күнүн көрсө байыаннай эпэрээссийэ кыттыылаахтарыгар эҕэрдэлэрин уонна махталларын тириэрдэн,  5 тыһыынчаттан тахса суругу ыыттылар.

Саха сиригэр олунньу 1-15 күннэригэр “Саллаакка сурук” Бүтүн Арассыыйатааҕы аахсыйаҕа өрөспүүбүлүкэ 17 улууһун уонна куораттарын уокуругун үөрэнээччилэрэ, оҕо уонна ыччат тэрилтэлэриттэн кытыннылар.

Оҕолорбут суруктарын Саха Өрөспүүбүлүкэтин Ыччат дьыалатыгар уонна социальнай коммуникацияларга министиэристибэтэ РФ Оборонаҕа министиэристибэтигэр ыытта. Бу суруктары байыастар  Аҕа дойдуну көмүскээччи күнүгэр тутуохтара.

Манна сыһыаран  эттэххэ, байыаннай эпэрээссийэҕэ сылдьар Хатас олохтооҕо Вячеслав Александрович Овчинников гуманитарнай көмө иһигэр маннык суругу тутан олус долгуйда. Суругу Хатас орто оскуолатын үөрэнээччитэ Леон  ыыппыт.