Саха сирин оҕолоро ментальнай арифметика чөмпүйэнээтигэр ситиһиилээхтик кытыннылар

Бэс ыйын 17-18 күннэригэр Чечня Өрөспүүбүлүкэтин Грознай куоратыгар “Билии — күүс” диэн ментальнай арифметика аан дойдутааҕы чөмпүйэнээтэ буолан ааста. Чөмпүйэнээти IQ Center Global Education тэрийэн ыытар.

Саха Өрөспүүбүлүкэтиттэн ментальнай арифметика педагог-тириэньэрэ, СӨ Ыччат бырабыыталыстыбатын уонна СӨ эдэр педагогтарын ассоциациятын чилиэнэ Айна Саввинова салайааччылаах түөрт оҕо кыттан олус үчүгэй түмүгү ситистилэр:

Айаал Винокуров (“Айыы Кыһата” гимназия 4-с кылааһын үөрэнээччитэ) – В3 категорияҕа 1 миэстэ;

Виолетта Титова (Илиҥҥи-Сибиирдээҕи лиссиэй 5-с кылааһын үөрэнээччитэ) – В3 категорияҕа 2 миэстэ;

Айтал Тимофеев (И.Н. Алексеева тиэхиньиичэскэй лиссиэйин 1(2)-с кылааһын үөрэнээччитэ) – В2 категорияҕа 1 миэстэ;

Айсен Никифоров (И. Барахов аатынан Үөһээ Бүлүүтээҕи 1-кы нүөмэрдээх оскуола 3-с кылааһын үөрэнээччитэ) – В2 категорияҕа чөмпүйүөннээтэ.

Маны таһынан, Сочи куоракка ыытыллыахтаах “Новое Поколение” ментальнай генийдэр норуоттар икки ардыларынааҕы I олимпиадаларыгар кыттарга икки путевканы туттулар.

Кырачаан олимпиецтары эҕэрдэлиибит уонна үөрэхтэригэр салгыы ситиһиилэри баҕарабыт! Бу туһунан СӨ Үөрэҕин уонна билимин министиэристибэтин саайтыгар суруллар.