Саха сирин оҕунан ытааччылара СНГ дойдуларын III Оонньууларыгар күүстээхтэр кэккэлэригэр

Алтынньы 2-5 күннэригэр Азербайджан Ханкенди куоратыгар СНГ дойдуларын III Оонньууларын чэрчитинэн оҕунан ытыыга күрэхтэһии буолан ааста. Бу туһунан «Стрельба из лука в России» (РФСЛ) пресс-сулууспата иһитиннэрэр.

Арассыыйа сүүмэрдэммит хамаандатын састаабыгар «Триумф» успуорка бэлэмнэнии киинин иитиллээччилэрэ – Али Лобашев уонна Мария Тараярова кыттан, үрдүк көрдөрүүнү ситиһэн, хамаанда уопсай кыайыытыгар сүҥкэн кылааттарын киллэрдилэр.

Арассыыйа эр дьонун хамаандата (Али Лобашев, Павел Семёнов, Максим Малафеев) күүстээх киирсиигэ Казахстан сүүмэрдэммит хамаандатын 5:3 ахсаанынан кыайан, кыһыл көмүс мэтээли ылла. Оттон Арассыыйа дьахталларын хамаандата (Мария Тараярова, Александра Цыденова, Ксения Карташова) Узбекистан сүүмэрдэммит хамаандатын кыайан, эмиэ пьедестал үрдүкү үктэлигэр таҕыста.

Тус киирсиигэ Мария Тараярова дьикти холкутун уонна кыайыыга дьулуурун көрдөрөн, Казахстан күрсэсчитин кытта тыҥааһыннаах финал кэнниттэн үрүҥ көмүс мэтээли ылла. Ол курдук Арассыыйа сүүмэрдэммит хамаандатыгар Павел Семёнов – тус бастыыр иһин киирсиигэ үрүҥ көмүс мэтээл;  Александра Цыденова – тус киирсиигэ боруонса мэтээл;  Максим Малафеев – боруонса мэтээл;  Павел Семёнов уонна Александра Цыденова – булкаас пааранан (микст) боруонса мэтээл киллэрдилэр. Күрэхтэһии түмүгүнэн Арассыыйа сүүмэрдэммит хамаандата мэтээл уопсай ахсаанынан бастакы миэстэни ылла: 2 кыһыл көмүс, 2 үрүҥ көмүс уонна 3 боруонса мэтээл.

Саха сирин сүүмэрдэммит хамаандатын старшай тириэньэрэ Балдар Балданов хамаанда «туйгуннук кыттыбытын» уонна норуоттар икки ардыларынааҕы аренаҕa Арассыыйааны уонна Саха сирин чиэстээхтик көмүскээбитин бэлиэтээтэ. Күрэсчиттэри – Али Лобашевы, Мария Тараярованы уонна Арассыыйа сүүмэрдэммит хамаандатын кыайыыларынан эҕэрдэлиибит.