Саха сирин ойуурдарыгар эриэйдэ үлэтин күүһүрдүөхтэрэ

Бэс ыйын 13 күнүгэр СӨ Бырабыыталыстыбатын бэрэссэдээтэлин бастакы солбуйааччыта Дмитрий Садовников ойууру баһаартан харыстааһыҥҥа суһал ыстаап мунньаҕын ыытта. Мунньах түмүгүнэн Дмитрий Садовников ойуурдарга эриэйдэ үлэтин күүһүрдэргэ сорудахтаата. 

Дмитрий Садовников эппитинэн, былырыын бу кэмҥэ Саха сиригэр 82 ойуур баһаара бэлиэтэммит буоллаҕына, быйыл барыта — 31.

Суһал ыстаап дааннайдарынан, бүгүн Уус Маайа уонна Томпо оройуоннарыгар уопсайа 27,5 иэннээх икки ойуур баһаарын умуруорууга үлэ ыытыллар.

Дьокуускай куоракка, Алдаҥҥа, Абыйга, Аммаҕа, Бүлүүгэ, Уус Алдаҥҥа, Уус Маайаҕа, Өлүөхүмэҕэ, Эбээн Бытантайга баһаары утары эрэсиимэ киллэриллибит.