Саха сирин ойуурдарыгар умайыы тахсыбата

От ыйын 7 күнүнээҕи туругунан, өрөспүүбүлүкэ сиригэр-уотугар ойуурга уонна сиринэн умайыы бэлиэтэммэтэ. Бу туһунан өрөспүүбүлүкэ суһал штаба суруйар.

Тэҥнээн эттэххэ, ааспыт сыл бу кэмигэр  уопсайа 326940,1 гектардаах  115 ойуур баһаара баара.

Быйылгы сезон саҕаланыаҕыттан 62 962,85 га иэннээх сиргэ 339 ойуур баһаарын тохтоттулар. Ол иһигэр ойуур пуондатын сиригэр – 154.

Өрөспүүбүлүкэҕэ баһаары утары ураты эрэсиим олохтоммута. Маны сэргэ сирдээҕи-уоттааҕы баһаары утары эрэсиими Дьааҥы, Өлүөхүмэ, Эбээн Бытантай оройуоннарыгар, ону тэҥэ Жатай куораттааҕы уокуругар олохтоотулар.

Сезон саҕаланыаҕыттан тыаҕа уот туруутугар буруйдаах 55 киһини булан, баһаартан кутала суох буолуу быраабылатын кэһиигэ 133 боротокуол толорулунна.

Ойуурга уот турбутун көрдөххүтүнэ суһаллык ойуур хаһаайыстыбатын эрэгийиэннээҕи диспетчерскэй сулууспатыгар биллэриҥ: +7 (4112) 44-74-76. Ону тэҥэ ойуур харыстабылын биир кэлим нүөмэригэр: 8-800-100-94-00.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата