Саха сирин олохтооҕо «Арассыыйа – кыахтары сайыннарар дойду» бириэмийэ дьоруойунан буолла

“Арассыыйа – кыахтары сайыннарар дойду”/“Россия – страна возможностей” национальнай бириэмийэ кыттыылаахтара Сириуска Аан дойдутааҕы ыччат бэстибээлигэр сырыттылар.

Бэстибээлгэ кыттар путевканы дойду 33 эрэгийиэниттэн 100 дьоруой ылла. Кинилэртэн биирдэстэринэн Саха сирин олохтооҕо , уопсастыбаннай диэйэтэл уонна омуктар икки ардыларыгар сыһыаннаһыылары бөҕөргөтөр бырайыактары оҥорооччу Хотамов Фаридун буолла.

Бириэмийэ кыттыылаахтара лиэксийэлэри иһиттилэр, трениннэргэ, маастар-кылаастарга, ону тэҥэ улахан шоуҕа кытыннылар.

«Биир киһи бүтүн эрэгийиэн, бүтүн дойду уонна аан дойду сайдыытыгар сабыдыаллыан сөп.  Дьону сонун идиэйэтинэн интэриэһиргэтэр киһи элбэҕи оҥорор. Ону национальнай бириэмийэ быһаччы дакаастыыр. Бириэмийэ кыттыылаахтарын бэстибээлгэ ыҥыран, кинилэр тустарынан устуоруйалары элбэх киһи истиэн баҕарбыппыт уонна “Россия – страна возможностей” – бу көннөрү лозунг буолбатаҕын туоһулуубут. Бүгүн аан дойдуттан 15000 тахса киһи тугу сөбүлээбитин талла. Киһи сүргэтин көтөҕөр устуоруйалартан биир саамай ордугун таллылар», — диэн бэлиэтээтэ Алексей Агафонов.

Национальнай бириэмийэ “Медиа” номинациятыгар кыттааччылартан биирдэстэринэн Дьокуускайтан Хотамов Фаридун буолар. Фаридун хоту дойдуга 5 саастааҕар кэлбитэ. 1994 с. бу дьоруой дьиэ кэргэнэ Таджикистаҥҥа гражданскай сэрииттэн сылтаан Душанбеттан куотан кэлбитэ.

Фаридун таджик норуота тугунан киэн туттуон сөбүн барытын көрдөрөр киһинэн буолуон баҕарбыта. 2023 сыллаахха кини салалтатынан “Саха сирин норуоттарын мөссүөннэрэ” хаартыска быыстапката аһыллыбыта. Манна 52 киһи кыттыбыта: 28 норуот бэрэстэбиитэлэ.

Фаридун эмиэ былырыын Саха Өрөспүүбүлүкэтигэр таджик тылынан бастакы диктаны ыытыыны көҕүлээбитэ. Национальнай сомоҕолоһуу күнүн уонна Таджикистан Өрөспүүбүлүкэтин тутулуга суох буолуутун күнүн тэрийбитэ. Саха сиригэр таджик общинатын уонна Саха сирин Ыччат ассамблеятын сонуннарын көрдөрөөр медиа-былаһаакканы үлэлэппитэ.

“Бириэмийэ кэминээҕи күннэр олус түргэнник аастылар.  Маннык киэҥ хабааннаах бырайыагы үлэлэтии дьоһун түгэнинэн буолла. Киһи сүргэтин көтөҕөр ТОП устуоруйалардаах 100 киһи иһигэр киирэр кыахтаммыппыттан үөрдүм. Кинилэрдиин алтыһан, үгүһү биллим. Бириэмийэҕэ кыттыым – бу биллэр дьону кытта билсиһии уонна олоҕу үчүгэй өттүгэр уларытыан баҕарар атын дьону көҕүлээһин”, — диэн санаатын үллэһиннэ Фаридун Хотамов.

“Россия – страна возможностей” национальнай бириэмийэ  Арассыыйа Бэрэсидьиэнин Владимир Путин сорудаҕынан тэриллибитэ. 2023 сыл ахсынньы 19 күнүгэр саҕаламмыта. Сайаапкалары 2024 сыл тохсунньу 31 күнүгэр диэри туппуттара. Бу кэм устата бириэмийэҕэ кыттарга 33 тыһыынча сайаапка 13 номинацияҕа киирбитэ: “Доруобуйа харыстабыла уонна мэдиссиинэ”, “Урбаан”, “Лидерство”, “Информационнай технологиялар уонна искусственнай интеллект”, “Экология”, “Туризм”, “Успуорт уонна уулусса култуурата”, “Наука уонна технологиялар”, “Инклюзия”, “Айар үлэ уонна искусство”, “Медиа”, “Үөрэхтээһин” уонна “Эрэгийиэннэри сайыннарыы”. РФ гражданнара, 18 саастарын туолбут дьон кытыннылар. Кинилэр бэйэлэрин дьыалаларынан дойдуну сайыннараллар, дьоҥҥо холобур буолаллар.

Бириэмийэ сүрүн түһүмэҕэ салҕанар. Кыттааччылар сайаапкаларын көрдүлэр, билигин эспиэрдэр устуоруйалары сыаналыахтара. Онтон норуот куоластыа уонна кыайыылаахтары быһаарыа. Кыттааччылар түһүмэҕи этэҥҥэ аастахтарына, тус кэбиниэттэригэр сэртипикээт ылыахтара. Бириэмийэ түмүгүн “Арассыыйа” норуоттар икки ардыларынааҕы быыстапка-пуорумҥа  биллэриэхтэрэ.

Бириэмийэ кыайыылаахтара “Россия – страна возможностей” бэрэсидьиэн платформатын  амбассадора буолуохтарын сөп. Спикер уонна эспиэр быһыытынан анал тэрээһиннэргэ ыҥырыллыахтара. “Дело в людях” документальнай киинэҕэ кыттыахтараа, Арассыыйа устун айанныахтара. “Сенеж” салайыы мастарыскыайыгар үөрэниэхтэрэ.

Норуот куоластааһынынан номинаннар испииһэктэрэ  premia.rsv.ru саайка тахсыаҕа.

СӨ Ил Дарханын уонна Бырабыыталыстыбатын пресс-сулууспата