Саха сирин олохтооҕо «Будущее» уопсастыбаннай бириэмийэ лауреата буолла

Москваҕа муус устар 27 күнүгэр «Центр духовно-нравственное единение «Будущее» НКО уопсастыбаннай бириэмийэтин туттарыы сиэрэ-туома ыытылынна.

Бу бириэмийэ наука, култуура, ускуустуба, биисинэс, успуорт, сонуннары киэҥник тарҕатар сириэстибэлэр бэрэстэбиитэллэригэр, уопсастыбаннай дипломаттарга, эмчиттэргэ, үөрэх тэрилтэлэрин үлэһиттэригэр киллэрбит өҥөлөрүн, НКО аһымал бырайыактарыгар, үүнэр көлүөнэни уонна төрөппүт көрүүтэ суох хаалбыт оҕолору иитиигэ кыттыыларын иһин туттарыллар.

Бириэмийэ лауреаттарыттан биирдэстэринэн Саха сирин олохтооҕо Лена Ефремова — Саха сирин уопсастыбаннай палаататын бэрэссэдээтэлин солбуйааччы, Доруобуйаларынан хааччахтаах оҕолору уонна обургу оҕолор доруобуйаларын чөлүгэр түһэрэр өрөспүүбүлүкэтээҕи киин дириэктэрин солбуйааччы. Кини Дьокуускайга 12 сыл «Берегиня» оҕо киинин салайбыта.
«Тулаайах оҕолору уонна төрөппүт көрүүтэ суох хаалбыт оҕолору кытта Москваҕа «Будущее России» Ассамблея-бэстибээлгэ кыттыбыппыт. Биһиги оҕолорбут онно талааннарын көрдөрбүттэрэ, үксүлэрэ бэстибээл дипломаннарынан буолбуттара«,— диэтэ Лена Ефремова.

«Будущее» бириэмийэ ларуреаттарынан 2024 сылга Екатерина Стриженова — Сэбиэскэй уонна Арассыыйа актрисата, тележурналист, Михаил Абрамян — Москва Доруобуйа харыстабылыгар департамена, оҕо хирура, мэдиссиинэ наукатын дуоктара, бэрэпиэссэр, Инесса Фомина — «7дней», «Караван историй» сурунааллар эрэдээктэрдэрэ, Татьяна Ремезова — суруналыыс, «Россия 1» телеханаал «Вести» бырагырааматын ыытааччыта, Виктория Андреянова — Арассыыйа худуоһунньук-модельера, Россиус Ирина — суруналыыс, «Вести» бырагыраама ыытааччыта, Наталья Белохвостикова — РСФСР норуодунай артыыската.

Бу уопсастыбаннай тэрилтэ 1998 с. тэриллибитэ. Оҕолору дьоллоох уонна туһалаах гражданнарынан, Ийэ дойдуларын туһугар эппиэтинэстээх гына уонна олох бары эйгэлэригэр көхтөөх буоларга иитэн таһаарар сыалы тутуһар дьону түмпүтэ.
Онон бу сыалынан салайтаран, киин «Будущее России» уопсастыбаннай бырайыак чэрчитинэн Оҕо айар сойуустарын тэрийэр — пуорумнары, бэстибээллэри, пресс-кэмпириэнсийэлэри, төгүрүк остуоллары.

СӨ Ил Дарханын уонна Бырабыыталыстыбатын пресс-сулууспата