Саха сирин олохтооҕо оҥочо мотуорун сакаастаары, 70 тыһ.солк. албыннаппыт

Томмот полициятын отделын дьуһуурунай чааһыгар 43 саастаах бульдозерист сайабылыанньа суруйбут. Кини саайт нөҥүө оҥочо мотуорун сакаастаары, 70 тыһ.солк. албыннаппыт. Бу туһунан СӨ ИДьМ иһитиннэрэр.

Эр киһи интэриниэтинэн мотуор сакаастаары, саайтка киирэн онуоха сөптөөх биллэриини булбут. Атыыһыты кытта сибээстэһэн, оҥочо сыанатын уонна хайдах тиксэрэллэрин ыйыталаспыт. Төлөбүр ааспытын кэнниттэн тырааныспар хампаанньатынан табаар тиксэриллиэхтээх эбит. Онон эр киһи табаарын төлөөн, кэлэрин кэтэспит.

Ыйы быһа кэтэһэ сатаан баран атыыһыты кытта сибээстэһээри гыммыта, төлөпүөнэ арахса сылдьар эбит. Онтон эр киһи түөкүттэр угаайыларыгар киирэн биэрбитин өйдөөбүт.