Саха сирин олохтооҕо Юлия Порядочных «Патриот» национальнай бириэмийэни ылла

Мииринэй оройуонун Аҕа дойду буойуннарын дьиэ кэргэннэрин кэмитиэтин салайааччытын солбуйааччы Юлия Порядочных «Патриот» национальнай бириэмийэ «Лучший проект по сохранению исторической памяти» диэн номинациятын ылла. Наҕараадалааһын «Россия» Национальнай кииҥҥэ Аҕа дойду Дьоруойдарын күнүгэр ыытылынна.

Юлия Порядочных бириэмийэни туттарыыга сатаан тиийбэтэх. Бу күннэргэ кини Дьокуускайга ыытыллар «Сыл учуутала-2025» өрөспүүбүлүкэтээҕи куонкуруска кытта сылдьар. Кини Мииринэйдээҕи 7-с №-дээх оскуолаҕа үлэлиир.

Бу үрдүк наҕарааданы Юлияҕа Мииринэйгэ байыаннай дьайыы түмэлин тэрийбитин иһин туттарылынна. Түмэли оҥоруу туһунан кини кэргэнэ, гвардия сержана Виктор Порядочных (позывнойа «Учитель» диэн) этии киллэрбит. Виктор байыаннай дьайыыга сылдьан бу бырайыагы толкуйдаабыт, ол эрээри олоххо киллэрбэккэ хаалбыт. Ону кэргэнэ сүүрэн-көтөн тэрийбит.

Сиһилии: https://www.sakha.gov.ru/news/16842