Саха сирин олохтоохторо 6 мөл. тахса солкуобайы массыыналарын гааска көһөрөн кэмчилээтилэр

Саха сирин олохтоохторо 6 мөл. тахса солкуобайы былырыын массыыналарын гааска көһөрөн кэмчилээтилэр. Ол курдук, хас биирдии суоппар 52 тыһыынча солкуобайы кэмчилээтэ. Ол туһунан бырамыысыланнас уонна геология министиэристибэтэ иһитиннэрэр диэн СИА суруйар. 

Биэдэмистибэ чахчытынан, айылҕа гааһын мотуор уматыгын курдук туһаныыга наадыйыы 23% улаатта, ити айылҕа оттугун 6,5 мөлүйүөн кууб миэтирэҕэ тэҥнэһэр. Маннык кэмчилээһин министиэристибэ ылынар өйөбүл миэрэлэринэн ситиһилиннэ.

Өрөспүүбүлүкэ олохтоохторугар туруоруллубут гаас-баллон тэрилин 90 %-ын төлүүргэ субсидия бэриллэр. Ол эбэтэр массыынаны бас билээччи 10 эрэ бырыһыаны төлүүр. Ону тэҥэ массыынаны гааска көһөрдөххө тырааныспар нолуога 50 % аччыыр.

Биэдэмистибэ салайааччыта Максим Терещенко айылҕа гааһын сыаната бэнсиинтэн үс төгүл чэпчэкитин бэлиэтээтэ. Маны сэргэ нэһилиэнньэ ороскуота уонна айылҕаҕа буортута аччыыр.

2030 сылга өрөспүүбүлүкэҕэ 40-ча гаас заправкатын тутуу былааннанар. Билигин эрэгийиэҥҥэ 23 гаас заправката, 10 газонаполнительнай компрессорнай уонна 23 көһө сылдьар гааһынан заправкалыыр ыстаансыйа бааллар.