Саха сирин олохтоохторо «Азбука о важном» диэн ураты бырайыакка кыттыахтара

Саха сирин олохтоохторо төрөөбүт дойдуга сыhыаннах саҥа тыллары айыахтарын сөп. Ураты тыллар оҕолорго аналлаах «Азбука о важном» диэн кинигэҕэ киириэхтэрэ. Социальнай көҕүлээһиннэри сайыннарыы пуондата «Азбука о важном» диэн ааттаах уопсастыбаннай бырайыак саҕаланарын биллэрдэ.

«Бу бырайыак РФ Бэрэсидьиэнин Уһук Илин уокуругар боломуочуйалаах бэрэстэбиилэ Юрий Трутнев көҕүлээһининэн, Арассыыйа үрдүнэн ыытыллар. Бу күннэргэ биһиги бырайыагы СӨ Үөрэҕин министиэристибэтин саайтыгар, онтон да атын информационнай ресурсаларга үчүгэйдик билиһиннэрдибит. Ону таhынан учууталларга, устудьуоннарга араас таһымнаах дьыалабыай оонньуулары ыыттыбыт», — диэн СӨ үөрэҕин миниистирэ Ирина Любимова иһитиннэрдэ.

Кыттыыны ыларга төрөөбүт дойдуга сыhыаннах тылы толкуйдаан уонна кини ис хоһоонун быһааран суруйуохха наада. Хомуллубут тыллар оҕолорго аналлаах кинигэ туһаныллыахтара. Бастыҥ, ураты тыллары айбыт дьоҥҥо кинигэ ааптарыскай экземплярын бэлэх уунуохтара.
Кинигэҕэ кырааскалыырга уонна уруhуйдуурга аналлаах түһүмэхтэр баар буолуохтара.