Саха сирин олохтоохторо байыастарга анаан 76 сааны туттардылар

Саха сирин олохтоохторо  байыаннай дьайыыга кыттар байыаннай сулууспалаахтарга өйөбүллэри оҥороллорун салгыыллар. «Сэрии сэбэ – фроҥҥа» диэн икки нэдиэлэлээх аахсыйа кэмигэр өрөспүүбүлүкэ олохтоохторо байыаннай дьайыыга анаан 12 калибрдаах 76 уһун остаах сааны туттардылар. Бу туһунан Росгвардия Саха сиринээҕи управлениетын пресс-сулууспата иһитиннэрэр.

Саха сириттэн сылдьар Хаҥыл диэн позывнойдаах байыаннай сулууспалаах Саха сирин олохтоохторун салгыы саалары туттарарга ыҥырда. Бу саалар байыаннай дьайыы байыастарыгар өстөөх дроннарын утары охсуһууга көмөлөһүөхтэрэ. Аахсыйа Оборуона министиэристибэтэ уонна Росгвардия көмөлөрүнэн иккис төгүлүн ыытыллар уонна атырдьах ыйын 18 күнүгэр саҕаламмыта.

Пилота суох аппарааттар дроннары утары охсуһууга туһалаах буоланнар, уһун уостаах сааларга ураты болҕомто ууруллар.

Санаттахха, саалары туттарыы бэрээдэгэ муҥутуур судургутутулубута – административнай моһоллор уһуллубуттара уонна болдьоҕо ааспыт лиссиэнсийэлэр иһин ыстарааптыыр миэрэлэр тохтотуллубуттара. «Байыастарбытын өйүүргэ кылааттарын киллэриэн баҕарар олохтоохтор хаһан баҕарар сааларын туттарыахтарын сөп. Сааны бас билээччи төлөбүрэ суох туттарар. Туттарбытын кэннэ саа учуоттан уһуллар», — диэн Росгвардияҕа бэлиэтээтилэр.