Саха сирин олохтоохторо «Дальний Восток — земля приключений» куонкуруска кытталлар

«Дальний Восток — земля приключений» куонкурус III сезонун үс ыйдааҕы түмүгүнэн дьүүллүүр сүбэ сыанабылыгар 162 киинэ киирдэ, бу былырыыҥҥыттан 2,5 төгүл кэриҥэ элбэх.

Бу туһунан бырайыак көҕүлээччитэ, РФ Бырабыыталыстыбатын Бэрэссэдээтэлин солбуйааччыта – РФ Бэрэсидьиэнин Уһук Илин федеральнай уокурукка боломуочуйалаах бэрэстэбиитэлэ Юрий Трутнев иһитиннэрдэ.

«Куонкурус  улаатан иһэр. Биһиги сорукпут – хайдах кыалларынан Уһук Илин уонна хотугу эрэгийиэннэр кэрэ көстүүлэрин арыйарыгар туһуланар. Тыытыллыбатах айылҕанан айан – бу дьиҥнээх айан-сырыы, олоххо сыһыаны уларытыан, санаа күүһүн, майгы кытаанаҕын уонна хамаанданан үлэлиир сатабылы тургутуон сөп. Оттон саамай сүрүнэ – киһи кыахтарын саҥаттан арыйар. Айан – бу мэлдьи күүһү холонуу, мэлдьи кыайыыга дьулуһуу. Биһиги айанньыттар харахтарынан кинилэр арыйыыларын, долгуйууларын, тулуурдарын, ситиһиилэрин көрөбүт.

Айан кэмигэр уһуллубут киинэлэр көмөлөрүнэн дойдубут үгүс олохтооҕо Уһук Илиҥҥэ уонна Арктикаҕа көтөн кэлиэхтэрин, бэлиэтэммит маршрутунан хаамыахтарын, урут аахпыт эбэтэр видеоҕа көрбүт сирдэрин бэйэлэрин харахтарынан көрүөхтэрин, дойдубут кэрэ муннуктарын арыйыахтарын баҕарыахтара диэн эрэнэбин», – диэтэ Юрий Трутнев.

Ордук элбэх сайаапка «Сатыы айан-сырыы» номинацияҕа киирбит – 106 киинэ. «Уунан айан-сырыы» номинацияҕа 29 видео-үлэ, «Кыһыҥҥы айан-сырыы» – 20, «Арктикатааҕы саайан-сырыы» – 7 киинэ киирдэ. Куонкуруска киирбит киинэлэр ахсааннарынан эрэгийиэннэр быыстарыгар Сахалин уобалаһа бастыыр – 68 видео. Иккис миэстэҕэ Хабаровскай кыраай – 36 киинэ, Амур уобалаһа уонна Камчатка кыраайа – сөп түбэһиннэрэн 13 уонна 12 киинэ.

Ону таһынан, дьүүллүүр сүбэ сыанабылыгар Приморскай кыраайга уһуллубут аҕыс үлэ, Еврейскай аптаныамыйалаах уобалаһыгар – алта үлэ киирбитэ көҥүллэннэ. Мурманскай уобалаһынан, Бурятия уонна Саха Өрөспүүбүлүкэлэринэн сырыылар тустарынан түөртүү киинэ, Забайкальскай кыраайтан – үс видео, Красноярскай кыраайтан – икки киинэ, оттон Чукотка уонна Ненецкэй аптаныамыйалаа уокуруктарыттан биирдии киинэ киирдэ.