Саха сирин олохтоохторо уот төлөбүрүгэр 50 мөл. солк. тахса суумаҕа иэстэммиттэр

Бу сыл тохсунньуттан ыам ыйыгар диэри «Якутскэнергосбыт» хампаанньа 50 мөл. солк. тахса суумалаах хомунаалынай өҥөлөр иэстэрин төлүүргэ 1,7 тыһ.тахса сөбүлэһиини түһэристэ.

Бүгүҥҥү күҥҥэ 60 сөбүлэһиинэн 1,5 мөл. солк. тахса суумалаах иэс толору төлөннө. Филиал салалтата үксүн уот төлөбүрүгэр иэһи төлүүргэ туһанааччыларга утары барар. Сөбүлэһиини түһэрсии кэмигэр туһанааччы иэс сууматын 30%-нын филиалга тутатына төлүүр, оттон хаалбыт иэһин өрүттэр сөбүлэспит кыраапыгар ыйыллыбыт болдьох иһигэр  ыытар буолар, диэн «Якутскэнергосбыт» хампаанньа пресс-сулууспата иһитиннэрэр.

«Туһанааччылар төлөбүр болдьоҕун кытаанахтык тутуһуохтаахтар, тоҕо диэтэххэ иэһи өлүүлээн төлүүр кыраапыгы кэһии сөбүлэһии тохтотулларыгар тиэрдэр. Онтон сылтаан иэстээх абонеҥҥа иэһин толору төлүөр диэри уотунан хааччыйыы тохтотуллар куттала үөскүүр», – диэн филиал нэһилиэнньэни кытта үлэлиир управлениетын начаалынньыга Юлия Ядрихинская санатта.