Саха сирин оскуолаларыгар патриоттуу иитиигэ уруоктар ыытыллаллар

Ахсынньы 1-10 күннэригэр Саха сирин бары оскуолаларыгар Аҕа дойду Дьоруойдарыгар аналлаах декада ыытыллар, ол иһигэр фашизм утары өрөспүүбүлүкэтээҕи пуорум чэрчитинэн «Диалог на равных» диэн кэпсэтии буолар. Бу туһунан СӨ Үөрэҕин уонна билимин миниистирин бастакы солбуйааччы Михаил Присяжнай иһитиннэрдэ. 

Ол курдук, ахсынньы 1-8 күннэригэр үөрэх тэрилтэлэригэр бойобуой дьайыы бэтэрээннэрин, ол иһигэр байыаннай эпэрээссийэ кыттыылаахтарын, патриотическэй иитии эспиэрдэрин кытта көрсүһүүлэр ыытыллаллар.

«Итиэннэ бу күннэргэ оскуолаларга «Хорсун буолуу уруоктара» буола тураллар. Уопсайа быйылгы үөрэх дьылыгар 2000 тахса маннык уруок ыытылынна. Тэрээһиҥҥэ 66 байыаннай дьайыы кыттыылааҕа уонна 53 бэтэрээннэр уопсастыбаннай тэриллиилэрин бэрэстэбиитэллэрэ кытыннылар. Ону таһынан, 68 үөрэх тэрилтэтигэр «Биһиги кинилэринэн киэн туттабыт!» диэн истиэндэлэр турдулар, 30 оскуолаҕа «Дьоруой паартата» оҥоһулунна», — диэтэ Михаил Присяжнай.