Саха сирин «Плейстоцен паарката» ООН кэмпириэнсийэтигэр кыттар

ООН Килиимэт уларыйыытыгар анаммыт 28-с кэмпириэнсийэтигэр (COP28) “Плейстоценовай паарка” бырайыак истиэндэтэ туруорулунна. Бу бырайыак Саха сиригэр сэлии истиэбин сөргүтэн олоххо киллэриинэн дьарыктанар. Паарка дириэктэрэ Никита Зимов истиэндэ улахан интириэһи тардыбытын туһунан кэпсээтэ:

— Кэмпириэнсийэ кыттыылаахтара уонна ыалдьыттара биһиги бырайыакпыт аттытыгар хаартыскаҕа түһэллэр, пааркаҕа билигин баар кыыллар туһунан ыйыталаһаллар, Плейстоцен үйэтин хойукку кэмин көрдөрөр иммерсивнай шоуну умсугуйан көрөллөр.

Быйыл Плейстоцен паарката Андрей Мельниченко Пуондатын өйөбүлүн ылан бырайыак сайдыытыгар улахан көмө оҥоһулунна. 10 сыллаах сөбүлэһии чэрчитинэн бу сир-дойду сирэйин уларытар кыахтаах баараҕай бырайыак үгүс эспэримиэннэри олоххо киллэриэхтээх.

Бырайыагы өссө Никита Сергеевич аҕата 1989 сылтан саҕалаан олоххо киллэрэн барбыта. Билигин Плейстоцен паарката харахха көстөр ситиһиилэрдээх, үгүс экологияҕа, килиимэти үөрэтиигэ сыһыаннаах чинчийиилэрэ наука эйгэтигэр саҥа көрүүлэри киллэрбиттэрэ.