Саха сирин преподавателэ «Билии.Лектор» куонкурус кыайыылааҕынан буолла

Москваҕа «Россия» национальнай кииҥҥэ олунньу 5 күнүгэр «Билии» уопсастыбатын Бүтүн Арассыыйатааҕы «Билии.Лектор» куонкурус төрдүс сезонун кыайыылаахтарын бэлиэтээтилэр.

Саха сириттэн кыайыылааҕынан М.К. Аммосов аатынан ХИФУ старшай преподавателэ Дмитрий Жирков буолла. Бу туһунан РФ «Билии» уопсастыбатын пресс-сулууспата иһитиннэрэр.

Кыайыылаах лиэксийэҕэ аныгы үөрэх кретивнай индустриятын кэпсээтэ: медиа, киинэ уонна тыйаатыр креативнай индустриялара.

2023 сыллаахха Дмитрий Жирков «Патриот» бириэмийэ «Сохранение и укрепление традиционных российских духовно-нравственных ценностей» номинациятын лауреатынан буолбута. Ону сэргэ нуучча тылын чинчийиигэ уонна үөрэтиигэ Ил Дархан бириэмийэтин лауреатынан буолар.

Куонкуруска барыта дойду 37 эрэгийиэниттэн 70 лектор кыайыылаах таҕыстылар. Хас биирдии кыттааччы бэйэтин сырдатар контенын тарҕатыыга 250 тыһыынча солкуобайы бириэмийэни ылла.

Наҕараадалары РФ Үөрэҕин миниистирэ Сергей Кравцов, РФ Бэрэсидьиэнин сүбэһитэ Елена Ямпольская, «Билии» уопсастыбатын генеральнай дириэктэрэ Максим Древаль, тааҥка войскатын капитана, Арассыыйа Дьоруойа, «Билии» уопсастыбаҕа патриотическай үлэҕэ департаменын дириэктэрэ Балдан Цыдыпов туттардылар.