Саха сирин психологтара байыастары уонна кинилэр чугас дьоннорун кытта 2,5 тыһ. тахса үлэни ыыттылар

Бэс ыйыгар өрөспүүбүлүкэ үрдүнэн уонна Ростов-на-Дону куоракка госпиталь хайысхатынан 1850 байыаннай дьайыы кыттыылааҕа уонна кинилэр дьиэ кэргэттэрин чилиэннэрэ хабылынна, 2500-тэн тахса биирдиилээн уонна бөлөҕүнэн ыытыллар психологическай үлэ көрүҥэ оҥоһулунна, ол иһигэр толору арыаллааһын чэрчитинэн хаттаан консультациялар киирэллэр.

Бу туһунан от ыйын 4 күнүгэр брифиҥҥэ Өрөспүүбүлүкэтээҕи психологическай киин дириэктэрэ Владимир Скрябин иһитиннэрдэ.

«Анал байыаннай дьайыы кыттыылаахтарыгар, кинилэр дьиэ кэргэттэрин чилиэннэригэр, ону таһынан атын кризиснэй хайысхаларынан  өҥөлөрө босхо оҥоһуллаллар. Биһиэхэ киирэр бары туһаайыылар «анонимнайдар» уонна «кистэлэҥнээхтэр», анал байыаннай дьайыы хайысхатынан эрэ буолбатах. Докумуон ирдэммэт, атын дьон аатынан эмиэ суруттарыахха сөп», – диэн Владимир Скрябин санатан эттэ.

Көмөнү уонна өйөбүлү үлэ чааһыгар бу нүөмэргэ суруттаран ылыахха сөп: 8 (4112) 31-91-09. Улуустарга баар Киин филиалларын контактарын бу нүөмэринэн билсиэххэ сөп. Ону таһынан, суукканы быһа үлэлиир итэҕэл төлөпүөнэ баар: 8-800-100-35-50 эбэтэр 122, онтон 6 уонна 2.