Саха сирин сайдыытын корпорацията саҥалыы үлэтин саҕалыа

СӨ Ил Дархана Айсен Николаев бэрэссэдээтэлинэн ыытыллыбыт дириэктэрдэр Сэбиэттэрин мунньаҕар Саха сирин сайдыытын корпорациятын (ССК) 2032 сылга диэри, оттон 2050 сылга диэри сыаллаах көрүүлээх Сайдыытын стратегиятын бигэргэттилэр. 2014 сыллаахха тэриллибит ССК инвестицияны тардар уонна саҥа оҥорон таһаарыылары олохтуур сыалтан урутаан сайдар социальнай-экэнэмиичэскэй сирдэр, индустриальнай пааркалар уонна атын бырамыысыланнас былаһааккаларын ситимин тэрийбитэ.

Дьон Корпорация кыттыылаах бырайыактарын билэллэр. Олор истэригэр – киинэ индустриятын, анимация, медиа уонна IT-сектор сайдыытын киинэ буолбут «Үлэ кыбаартала» креативнай кластер баар. ССК хонтуруолунан экэниэмикэ араас сектордарыгар — туризмтан уонна технологиялартан саҕалаан бырамыысыланнас оҥорон таһаарыытыгар тиийэ чааһынай хапытаалы тардар уонна бөдөҥ бырайыактары олоххо киллэрэр инвестиционнай платформалар сайдаллар.

Балаҕан ыйын 27 күнүгэр, Саха сирин судаарыстыбаннаһын күнүгэр, Айсен Николаев Корпорация үлэтин хайысхаларын кэҥэтэр Ыйаахха илии баттаабыта. Докумуоҥҥа сөп түбэһиннэрэн, ССК тэрилтэлэр капитализацияларын улаатыннарыыга, креативнай экэниэмикэни сайыннарыыга, инвестицияны тардыыга, технологическай уонна научнай баһыйыыны хааччыйыыга уо.д.а. хайысхаларга стратегическай бырайыактары уонна көҕүлээһиннэри сүрүннүүр, саҕалыыр, оҥорор уонна арыаллыыр тирэх тэрилтэнэн быһаарыллыбыта.

Саҥа Сайдыы стратегията үөһэ этиллибити учуоттаан оҥоһулунна. Бу докумуон уһун болдьоххо уопсастыба үлэтин сүрүн хайысхаларын, сыалларын уонна мэхэньииһимнэрин быһаарар, ону тэҥэ эрэгийиэн экэнэмиичэскэй улаатыытыгар туһуламмыт стратегическай бырайыактары олоххо киллэриигэ олук буолар.

Саха сирин Ил Дархана бэлиэтээбитинэн, Стратегияны ылыныы – эрэгийиэн сайдыытын саҥа моделын олохтооһуҥҥа улахан суолталаах түһүмэх. Кини санаатынан, Корпорация оруола өйөбүл үнүстүүттэрин үгэс буолбут бэлиэлэрин таһынан тахсыахтаах. Эрэгийиэҥҥэ салайыы көдьүүһүн уонна инвестицияҕа тардыылаах буолуутун саҥа стандартын чуолаан корпорация олохтуохтаах диэн кини эрэллээх. «Сайдыы корпорацията өрөспүүбүлүкэ экэниэмикэтин саҥардыыга сүрүн үнүстүрүмүөннэртэн биирдэстэрэ буолуохтаах. Биһиэхэ саҥа салаалары үөскэтэр, эрэгийиэн активтарын капитализациятын улаатыннарар уонна кэлэр кэскил экэниэмикэтин тэрийэр кыахтаах чуолкай, олоххо киирэр кыахтаах уонна улахан соруктардаах стратегия наада», — диэн Айсен Николаев эттэ.

Кини этэринэн, Сайдыы корпорацията урутаан үлэлээн үөрэниэхтээх, саамай уустук уонна кэскиллээх соруктары бэйэтигэр ылыныахтаах. Үлэтин хаачыстыбатыттан сайдыы саҥа туочукалара үөскээһинэ, инвестордары тардыы, технологиялар сайдыылара уонна олохтоохтор дохуоттара үрдээһинэ тутулуктаах диэн Ил Дархан ааҕар. Стратегия үс түһүмэхтээх: 2027 сылга диэри — олоҕуруу, 2030 сылга диэри — кэҥэтии, уонна 2031-2032 сылларга — бигэ дохуокка тахсыы. Туруоруллубут соруктары ситиһэр туһуттан корпорация киэҥ таһымнаах үнүстүрүмүөннэри туһаныа: өлүүлээн кыттыыттан уонна опционнаах схемалартан саҕалаан, анал инвестиционнай пуондаларга, инвестиционнай табаарыстыба дуогабардарыгар уонна бөдөҥ бырайыактары арыаллыыр мэхэньииһимнэргэ тиийэ.

Ырытыы кэмигэр дириэктэрдэр сэбиэттэрин чилиэннэрэ сүрүн стратегическай хайысхаларга болҕомтону уурар наадатын бэлиэтээтилэр. Научнай уопсастыбаны кытта алтыһыы туспа дьүүллэһилиннэ. Сэбиэт чилиэннэрэ Наукалар академияларын уонна Дьокуускайдааҕы научнай киин үнүстүүтүн кыттыытын кэҥэтэргэ, чинчийиилэр практикаҕа туһалаах хараахтырдарын күүһүрдэргэ, ону тэҥэ саҥа оҥоһуктарга корпоративнай сакаастар мэхэньииһимнэрин тэрийэргэ этии киллэрдилэр.

Дьүүллэһиини түмүктээн, өрөспүүбүлүкэ баһылыга ылыллыбыт стратегия эрэгийиэн кэлэр кэскиллээх социальнай-экэнэмиичэскэй сайдыытыгар тирэх буолуоҕун, ол эрээри кини олоххо киириитин ситиһиитэ бырассыас бары кыттааччыларын толорууга бэрээдэктэриттэн уонна идэтийиилэриттэн тутулуктааҕын эттэ. «Стратегияны биһиги бүгүн бигэргэтэбит, ол эрээри түмүгэ сылларынан сыаналаныа. Ылыллыбыт бары сыаллар уонна мэхэньииһимнэр биир кэлимник уонна олоххо киирэллэрэ улахан суолталаах», — диэн Айсен Николаев бэлиэтээтэ.