Саха сирин сайыҥҥы спортивнай лааҕырдарынан 3500-тэн тахса оҕо сынньанар

Өрөспүүбүлүкэҕэ уон физкултуурунай-чэбдигирдэр лааҕырдарынан СӨ Физическэй култуураҕа уонна успуорка министиэристибэтин иккис сезона саҕаланна.

Оҕолор сынньалаҥы уонна чэбдигирдиини Чурапчы, Сунтаар, Хаҥалас, Нам, Алдан уонна Уус Алдан улуустарыгар ааһаллар диэн  СӨ Ил Дарханын уонна Бырабыыталыстыбатын пресс-сулууспата суруйар. Сайыҥҥы лааҕырдар хампаанньаларын үһүс сезонугар суукканы эргиччи уонна күнүскү өттүгэр 3558 оҕо, 182 үлэһит, ол иһигэр 67 тириэньэр хабыллыаҕа. Иитиллээччилэр ортолоругар анал байыаннай дьайыы кыттыылаахтарын оҕолоро бааллар. Чурапчытааҕы спортивнай оскуола-интэринээт баазатыгар оҕолор оҕунан ытыыга, дуобакка уонна көҥүл тустууга дьарыктаналлар. Уус Алдан улууһугар «Чубучааны» спортивнай баазатыгар иккис сезонугар «Олимпиада» лааҕыр төгүрүк суукканы быһа үлэлиир.Манна 44 оҕо дьарыктанар, сэттэ үлэһит, ол иһигэр үс тириэньэр үлэлиир.

«Оҕолору интэриэһинэй тэрээһиннэр күүтэллэр. Лааҕыр бастакы сезонугар 30 оҕо үөрэннэ. Ол тухары чэбдигирдиигэ, успуорка, култуураҕа уонна үөрэххэ сыһыаннаах араас тэрээһиннэр ыытылыннылар, ЫБММ үлэһиттэрин маастар-кылаастара тэрилиннилэр уонна анал байыаннай дьайыы кыттыылаахтарын кытары көрсүһүү буолла», — диэн «Бороҕоннор» олимпийскай резервэ спортивнай оскуолатын дириэктэрин солбуйааччы Геннадий Атласов иһитиннэрдэ. Хаҥалас оройуонун Үөһээ Бэстээҕэр О.Г. Гребнев аатынан «Лэглэлэр» спортивнай-чэбдигирдэр лааҕыра аһыллыбыта. Манна 14-тэн үөһэ саастаах оҕолору боксаҕа уонна дзюдоҕа угуйаллар.

«Сүрүн болҕомто оҥолор уопсай физическэй туруктарын уонна спортивнай дьоҕурдарын сайыннарыыга ууруллар. Күн ахсын дьарыктар Өлүөнэ эбэ кытылыгар аһаҕас салгыҥҥа буолаллар. Ону сэргэ патриотическай иитиигэ ураты болҕомто ууруллар. Оҕолору күҥҥэ биэстэ аһылыгынан хааччыйаллар. Сынньалаҥ тэрилтэтигэр тириэньэрдэр, мэдиссиинэ үлэһиттэрэ, повардар уонна оробуочайдар үлэлииллэр», — диэн кэпсээтэ өрөспүүбүлүкэтээҕи кэллиэс спортивнай отделын начаалынньыга Александр Моисеев. Лааҕырынан барыта  быйыл Саха сирин 45 тыһыынчаттан тахса оҕону хабар былааннаахтар.