Саха сирин санитарнай авиацията 2,4 тыһыынчаттан тахса киһи олоҕун быыһаата

«Саха сирин санитарнай авиацията бу сылга 2,4 тыһыынчаттан тахса киһи олоҕун быыһаата. Бүтэһик биэс сылга бу сыыппара 14 тыһыынчаны аһарда», — диэн Ил Дархан Айсен Николаев телеграм-ханаалыгар бүгүн, сэтинньи 1 күнүгэр, суруйар.

«Өрөспүүбүлүкэбит сирэ-уота киэҥ, сылы эргиччи сылдьар суол суох уонна ыраах сытар нэһилиэнньэлээх пууннардаах буолан, дьоҕус авиация олус наада. «Доруобуйа харыстабыла» национальнай бырайыак олоххо киирэн уонна дойду бэрэсидьиэнэ Владимир Путин сорудаҕынан Уһук Илиҥҥэ санитарнай авиация сайдыыта үбүлэнэн, Саха сиригэр санавиацияҕа улахан болҕомто ууруллар, сырыыта суох оройуоннартан ыарыһахтары эвакуациялааһын систиэмэтэ тубуста», — диэн Ил Дархан бэлиэтиир.

Саха сиригэр санавиация суудуналара күннэтэ кэриэтэ көтөллөр. «Быраастар уонна пилоттар ардыгар бэйэлэрин олохторун толук ууран туран, көмө наада сиригэр көтөллөр. Саха сирин бары олохтоохторун аатыттан махталбын тиэрдэбин», — диир Айсен Николаев.