Саха сирин сорох улуустарыгар күүскэ тыалырыаҕа, хаар түһүөҕэ

Бу күннэргэ Саха сирин сорох улуустарыгар сөкүүндэҕэ 20 миэтэрэҕэ тиийэ түргэннээх күүстээх тыал, хойуу хаар түһэрэ күүтүллэр диэн ЯУГМС саайтыгар суруйаллар.

Бүгүн, балаҕан ыйын 15 күнүгэр, Кэбээйи уонна Эдьигээн улуустарыгар ардаҕы кытта хойуу хаар түһэрэ күүтүллэр. Өлөөн, Кэбээйи, Эдьигээн, Мииринэй, Ленскэй, Сунтаар, Ньурба, Бүлүү уонна Үөһээ Бүлүү улуустарыгар сөкүүндэҕэ 15-20 миэтэрэ түргэннээх тыал түһэрэ күүтүллэр.

Бу күҥҥэ Анаабырга, Өлөөҥҥө, Өлүөнэ өрүс алын өттүгэр сытар оройуоннарга, Мииринэй оройуонун хоту өттүгэр ардах, инчэҕэй хаар түһүөҕэ. Киин, соҕуруу уонна хотугулуу-илиҥҥи улуустарга кыратык ардыаҕа, хайалаах сирдэргэ инчэҕэй хаар түһүөҕэ.