Саха сирин спортсмена Кытайга ультратрейл күрэҕэр 10 бастыҥ иһигэр киирдэ

Саха сириттэн сылдьар Григорий Максимов Кытайга ыытыллыбыт ультратрейл күрэҕэр 10 бастыҥ спортсмен иһигэр киирдэ. Кини барыта 110 килэмиэтир суолу ааһан, бэйэтин саастыылаахтарын ортолоругар алтыһынан финишкэ тиийдэ.

Ультатрейлга спортсменнар бэлэмнэммит көнө суолунан буолбакка, айылҕаҕа ыллык устун сүүрэллэр. Спортсмен бу күрэх дистанциятын 15 чаас 41 мүнүүтэ устата ааста. Онон уопсай түмүккэ 2000 кыттааччыттан 47-с миэстэ буолары ситистэ.

«Григорий күрэхтэһиигэ эрдэттэн бэлэмнээх этэ, ол гынан баран сүүрүү саҕаланыан аҕай иннинэ кыратык эчэйбитэ. Итинник балаһыанньаҕа сылдьан даҕаны, кини уостубакка бэйэтин саастыылаахтарын ортолоругар 10 бастыҥ ахсаанарыгар киирдэ», — диэн спортсмен тириэньэрэ Марфа Троева бэлиэтээтэ.

Григорий Максимов Кытайга олорор уонна үлэлиир. Иллэҥ кэмигэр трейловай сүүрүүнэн дьарыктанар. Бу иннинэ кини эмиэ ультратрейл күрэҕэр бириистээх миэстэлэры ыла сылдьыбыта. Ол курдук, 2020 сыллаахха 50 килэмиэтир дистанцияҕа кыайыылаах буолбута.