Саха сирин спортсменката Карина Ефимова дзюдоҕа Арассыыйа чөмпүйэнээтин кыһыл көмүс мэтээлин ылла

Саха сирин дзюдоистката Карина Ефимова «Сириус» федеральнай территорияҕа ыытыллар дзюдоҕа эр дьоҥҥо уонна дьахталларга Арассыыйа чөмпүйэнээтин кыһыл көмүс мэтээлин хаһаайына буолла.

Карина Ефимова 52 кг ыйааһыҥҥа Иркутскай уобаластан Марина Перминованы кыайда, онтон салгыы Краснодартан Эвелина Петрованы кытта киирсиигэ хотуулаах таҕыста, ити кэннэ Краснодартан Анастасия Гайдугу кыайда. Саха сирин спортсменката полуфиналга тиийэн, Европа чөмпүйүөнэ Кристина Дудинаны кытта кииристэ. Утарсааччытын кытта киирсиигэ үрдүк кылаастаах уопутун көрдөрөн кыайыылаах таҕыста.

Финалга кини Саратовтан Арассыыйа сүүмэрдэммит хамаандатын лидердэриттэн биирдэстэрэ Лилия Нугаева утары таҕыста. Карина Ефимова бу киирсии кэннэ Арассыыйа чөмпүйэнээтин кыһыл көмүс мэтээлин ылары ситистэ.

Карина Ефимова Саха сирин устуоруйатын тухары улахан дьоҥҥо дзюдоҕа Арассыыйа үһүс  чөмпүйүөнүнэн буолла. 2019 с. бастакы чөмпүйүөн — Ньургуйаана Никифорова (78 кг), иккис — 2023 с. Аина Моисеева (48 кг) этэ.