Саха сирин суруйааччыларын сойууһа Арассыыйа араас норуоттарын литератураларын бар дьоҥҥо ааҕыллыамтыа оҥорор туһунан этии көтөхтө

Саха сирин суруйааччыларын сойууһа Арассыыйа араас норуоттарын литератураларын бар дьоҥҥо ааҕыллыамтыа оҥорор туһунан этии көтөхпүт. Бу туһугар уус-уран тылбааһы тупсарар, сайыннарар бырагырааманы оҥорон таһаарыы туһунан этиллэр. Маннык этиилээх РФ бэрэсидьиэнэ Владимир Путин уопсастыбаннай приемнайыгар СӨ суруйааччыларын сойууһун бэрэссэдээтэлэ Гаврил Андросов этии киллэрбит.

Маны сэргэ, кини Арассыыйа норуоттарын литературнай нэһилиэстибэтэ бар дьоҥҥо чугас уонна маассабай буоларын туһугар кииннэммит кинигэ оҥорон, бэчээттээн таһаарар кыһа тэриллиэхтээҕин туһунан эппит. Маны таһынан Гаврил Андросов Владимир Путин аадырыһыгар  национальнай суруйааччылары өйүүр, кинилэри киэҥ эйгэҕэ таһаарар туһуттан Бүтүн Арассыыйатааҕы бириэмийэ көрүллүүтүн туһунан этии киллэрбит. Кини быһаарарынан, Арассыыйаҕа литературнай сурунааллар дьылҕалара билигин уустук балаһыанньаҕа  сылдьар. Владимир Путин уопсастыбаннай приемнайа Саха сиригэр ааспыт сыл ахсынньытыттан үлэлиир. Биһиги өрөспүүбүлүкэбит олохтоохторун этиилэрин, баҕа санааларын барытын салгыы хандьыдаакка тиэрдэллэр.

Бэлиэтээн суруйдахха, Арассыыйа бэрэсидьиэнин быыбара бу дьыл кулун тутар 15-17 күннэригэр буолуоҕа. Кииннэммит быыбардыыр хамыыһыйа быыбарга түөрт хандьыдааты кытыннарар. Ол курдук, билигин үлэлии олорор бэрэсидьиэммит Владимир Путин (бэйэ туруорунуута), Николай Харитонов (КПРФ), Леонид Слуцкий (ЛДПР), Владислав Даванков («Новые люди»).