Саха сирин сүүмэрдэммит хамаандата чэпчэки атлетикаҕа чаҕылхай кыайыыланна

Олунньу 1 күнүттэн 6 күнүгэр диэри Новочебоксарскайга ыытыллыбыт хамсанар аппараата кэһиллиилээх күрэсчиттэр ортолоругар Арассыыйа Куубагар Саха Өрөспүүбүлүкэтин сүүмэрдэммит хамаандатын күрэсчиттэрэ үрдүк таһымнаах бэлэмнэрин көрдөрөн, хас да кыһыл көмүс мэтээли ылаттаатылар диэн «Триумф» пресс-сулууспата иһитиннэрэр.

Саргылаан Семёнов 60 м уонна 400 м сүүрүүгэ 51,95 сөкүүндэ түмүктээх кыайан, икки кыһыл көмүс мэтээл хаһаайына буолла уонна сүүмэрдэммит хамаанда лидерэ буоларын өссө төгүл бигэргэттэ.

Айаал Сивцев ядроны анньыыга 12,05 м көрдөрөн уонна Арассыыйа саҥа рекордун олохтоон, эрэллээх кыайыыны ситистэ.

Роман Ибрагимов устаны ыстаныыга күрэхтэһиигэ 6,35 м көрдөрөн кыайда, бу эмиэ дойду рекорда буолла. Виктория Петрова ядроны анньыыга 10,23 м түмүгү көрдөрөн уонна Арассыыйа рекордун олохтоон, пьедестал үрдүкү үктэлигэр таҕыста.