Саха сирин сүүмэрдэммит хамаандата греко-римскай тустууга Арассыыйаҕа иккис буолла

Кулгаахтарынан мөлтөхтүк истэр күрэсчиттэр икки ардыларыгар греко-римскай тустууга Арассыыйа бастыыр иһин күрэхтэһиитигэр Саха сирин бэрэстэбиитэллэрэ хамаанданан түмүккэ иккис миэстэни ыллылар.

Бу туһунан Сүүмэрдэммит хамаандалары успуорка бэлэмниир өрөспүүбүлүкэтээҕи кииҥҥэ иһитиннэрдилэр.

Күрэхтэһии Орел куоракка юниордар ортолоругар ыытылынна. Хамаанданан түмүккэ Саха сирин сүүмэрдэммит хамаандата Москва хамаандатыгар эрэ иннин биэрдэ. Оттон үһүс миэстэни олохтоох тустууктар ыллылар. Күрэсчиттэр ситиһиилээхтик киирсибиттэрин түмүгэр маннык үрдүк көрдөрүү ситиһилиннэ. 55 кг диэри ыйааһыҥҥа Кирилл Охлопков күрэхтэһии кыайыылааҕынан буолла. Арылхан Гаврильев үрүҥ көмүс мэтээли ылла (72 кг диэри). Амархан Брусенин (67 кг) уонна Тимофей Стручков (63 кг) боруонса наҕараадаларынан бэлиэтэннилэр. Николай Свинобоев мэтээлтэн биир хардыынан хаалла. Саха сирин сүүмэрдэммит хамаандата тириэньэрдэр Василий Стрекаловскай, Эрчимэн Макаров уонна Петр Соловьев салайыыларынан кытынна.