Саха сирин сүүмэрдэммит хамаандата оҕунан ытыыга Арассыыйа чөмпүйэнээтигэр үс мэтээли ылла

Саха сирин сүүмэрдэммит хамаандата бу сыл сүрүн күрэхтэһиитигэр – Орел куоракка ыытыллыбыт оҕунан ытыыга Арассыыйа чөмпүйэнээтигэр ситиһиилээхтик кытынна.

Күрэхтэһии  түмүгүнэн хамаандаҕа үс мэтээл киирдэ: биир үрүҥ көмүс уонна икки боруонса. Бу туһунан СӨ оҕунан ытыыга федерацията иһитиннэрэр.

Бастакы ситиһиини Дайаана Винокурова тус бастыыр иһин киирсиигэ (блочнай ох) ылла. Үһүс миэстэ иһин тыҥааһыннаах киирсиигэ кини Башкортостантан сылдьар Елизавета Боброваны 147:143 ахсаанынан кыайан, боруонса наҕараадаҕа тигистэ.

Бурятия сүүмэрдэммит хамаандатын утары киирсиигэ саха охчуттара тулуурдарын көрдөрөн, 233:228 ахсаанынан кыайан, өрөспүүбүлүкэҕэ боруонсаны ыллыллар. Күн чаҕылхай түмүгүнэн дьахталлар ортолоругар классическай оҕунан ытыыга финал буолла, онно Мария Тараярова пьедестал үрдүкү үктэлин иһин кииристэ.

Краснодартан сылдьар Екатерина Богатыреваны утары быһаарыылаах киирсиигэ Мария баһыйтаран, дойду чөмпүйэнээтин үрүҥ көмүс призерунан буолла.

«Маннык таһымнаах күрэххэ үрүҥ көмүс уонна икки боруонса мэтээл Саха сирин оҕунан ытыытын оскуолата дойду күүстээхтэрин ахсааныгар бигэтик киирэрин бигэргэтэллэр», – диэн Оҕунан ытыы федерациятын толорооччу дириэктэрэ Василий Румянцев бэлиэтээтэ.

Санатан эттэххэ, урут Орел куоракка Арассыыйа Куубагар сахалар икки көмүс, үс үрүҥ көмүс уонна биэс боруонса наҕарааданы, оттон Арассыыйа бастыыр иһин күрэҕэр – биир көмүс, үс үрүҥ көмүс уонна икки боруонса наҕарааданы ылбыттара.