Саха сирин сүүмэрдэммит хамаандата Параатлетика кубогар ситиһиилээхтик кытынна

Чебоксарыга Арассыыйа күүстээх спортсменнара кыттыылаах Параатлетикаҕа чөмпүйүөннэр кубоктара түмүктэннэ. Күрэхтэһиигэ Саха сирин сүүмэрдэммит хамаандата туйгун түмүгү ылары ситистэ.

“Триумф” спортивнай комплекс телеграм-ханаалыгар иһитиннэрбитинэн, хас биирдии спортсмен бу турнирга иккилии мэтээли ылар кыахтаах этэ: бастаан кыттааччылар бэйэлэрин кылаастарыгар ким бастыҥын булан ылаллар, ол кэннэ кинилэр түмүктэрин атын кылаас спортсменнарын кытта холбууллар, ол түмүгүнэн абсолютнай зачекка саамай күүстээх ким буолбута көстөр.

Ол курдук Саргылаан Семенов тута түөрт кыһыл көмүс мэтээли ылла. Бастаан бэйэтин кылааһыгар сүүс миэтирэҕэ сүүрүүгэ кыһыл көмүһү ылбыта, ону кытта абсолюткаҕа эмиэ бастыҥынан буолбута. Семенов уһуну ыстаныыга кыттан, пьедестал үрдүгэр эмиэ иккитэ тахсыбыта.

Айаал Сивцев дьаадыраны анньыыга бэйэтин кылааһыгар кыһыл көмүһү ылбыта, абсолюткаҕа үһүс буолбута. Эмиэ маннык түмүгү үҥүүнү быраҕыыга көрдөрбүтэ. Уопсай зачекка кинини бэйэтин хамаандатын киһитэ Виктор Евсеев иккис миэстэни ылан уонна бэйэтин кылааһыгар бастаан, Айаал иннигэр түспүтэ.

Сүүмэрдэммит хамаанда сүрүн тириэньэрэ Василий Олёнов уһуну ыстаныыга иккис миэстэни ылбыт Роман Ибрагимов көрдөрүүтүн эмиэ бэлиэтээтэ. Бүтэһиккэ диэри кини бастаан испитэ, ол гынан баран икки Паралимпийскай оонньуулар кыттыылаахтара Сергей Бирюков кини иннигэр түһэн кэбиспитэ. Ол да буолар Ибрагимов аан дойду кылаастаах спорт маастарын нуорматын толордо, ону кытта аан дойду рейтининэн бу ылбыт түмүктэрин көрдөрүүтүнэн бэйэтин кылааһыгар иккис нүөмэринэн сылдьар.

Үҥүүнү быраҕыыга бэйэтин кылааһыгар Анатолий Самсонов кыһыл көмүс мэтээли, Яков Максимов үһүс миэстэни ыллылар. Улахан күрэхтэһиигэ аан бастаан кыттар Айна Лобанова 100 м. сүүрүүгэ төрдүс буолла.

Салгыы сүүмэрдэммит хамаанда от ыйын 7-15 күннэригэр эмиэ Чебоксарыга ыытыллар Арассыыйа чөмпүйэнээтигэр кыттыаҕа.