Саха сирин сүүмэрдэммит хамаандатын 13 боксера Арассыыйа чөмпүйэнээтигэр путевка иһин киирсиэхтэрэ

Мииринэйгэ Александр Федотов кэриэһигэр Бүтүн Арассыыйатааҕы боксаҕа күрэхтэһии полуфинальнай киирсиилэрэ түмүктэннэ.

Бүгүн, от ыйын 5 күнүгэр, Саха сирин сүүмэрдэммит хамаандатын 13 боксера рингэҕэ тахсан Арассыыйа чөмпүйэнээтигэр путевка иһин киирсиэхтэрэ диэн «Триумф» успуорт киинэ иһитиннэрэр.

51, 57, 60 уонна 80 киилэҕэ Саха сирин сүүмэрдэммит хамаандата Арассыыйа чөмпүйэнээтигэр путевкалары уонна күрэхтэһии кыһыл көмүс мэтээллэрин ылары мэктилээтэ, тоҕо диэтэххэ, күрэх финалыгар биир хамаандалаахтар көрсүөхтэрэ.

48 киилэҕэ Эрчим Пестряков утарсааччытынан Тыва эдэрдэргэ Арассыыйа чөмпүйэнээтин кыайыылааҕа Эрес Каржал буолуоҕа.

Мухаммадайюб Исмаилов финалга Красноярскайтан сылдьар Леонид Чебодаевы кытта көрсүөҕэ.

Достанбек Шингилов (71 кг) утарылаһааччытынан Москва бэрэстэбиитэлэ Алексей Денисов буолуоҕа.

Данил Прокудин Красноярскай бөһөҕүн Иосиф Штурхецкайы кытары киирсиэҕэ.

Оттон 86 киилэҕэ диэри ыйааһыҥҥа Константин Шестаков финалга Иркутскайтан сылдьар Егор Бутаковы киирсиэҕэ.

Киирсии олохтоох бириэмэнэн 17:00 чаастан саҕаланыаҕа.

Быһа эпиири бу сигэнэн көрүөххэ сөп: https://vkvideo.ru/video-148618057_456254258?list=229c37c230a2befb9b

@triumphsakha

@teamsakha