Саха сирин сүүмэрдэммит хамаандатын тустууктара Бесик Кудухов кэриэһигэр турнирга кыттыахтара

Алтынньы 11-13 күннэригэр Краснодар куоракка Арассыыйа успуордун үтүөлээх маастара Бесик Кудухов кэриэһигэр 21 саастарыгар диэри юниордарга  тустууга Бүтүн Арассыыйатааҕы турнир ыытыллыаҕа.

Саха сирин сүүмэрдэммит хамаандатын састаабыгар көҥүл тустууга 23 тустуук кыттыыта күүтүллэр. Бу туһунан Өрөспүүбүлүкэтээҕи сүүмэрдэммит хамаандалары успуорка бэлэмнээһин киинигэр иһитиннэрдилэр. Саха сирин хамаандата старшай тириэньэрэ Василий Неустроев салайааччылаах өрөспүүбүлүкэ киинигэр бэлэмнэнии түһүлгэтин ааста. Бу турнир 2026 сылга Арассыыйа сүүмэрдэммит хамаандатыгар күрэсчиттэри сүүмэрдээһин систиэмэтигэр киирэр. Алтынньы 11 күнүгэр 57, 65, 74, 86, 97 уонна 125 кг диэри ыйааһыннаахтар киирсиилэрин саҕалыахтара, кинилэр финальнай хапсыһыылара сарсыныгар былааннанар. Алтынньы 12 күнүгэр көбүөргэ 61, 70, 79, 92 кг диэри ыйааһыннаах тустууктар тахсыахтара. Кинилэр мэтээл иһин киирсиилэрэ алтынньы 13 күнүгэр буолуоҕа.

Саха сирин сүүмэрдэммит хамаандатын састаабыгар киирдилэр:

• 57 кг: Денис Игнатьев, Антон Григорьев, Роман Кириллин, Юрий Винокуров, Иосиф Никонов, Михаил Осипов, Вадим Прядезников;
• 61 кг: Владимир Литвинов, Максим Григорьев, Сэмэн Сивцев;
• 65 кг: Айкар Марков, Влад Ноговицын;
• 70 кг: Гаврил Варламов, Анатолий Иванов, Константин Слепцов, Мичил Стручков, Сергей Некрасов;
• 74 кг: Уйгун Бурцев, Давид Чириков, Алексей Захаров, Дамир Шевелев, Вадим Винокуров;
• 97 кг: Сахаян Абрамов.