Саха сирин тирэх пууннарын үлэһиттэрэ анал байыаннай дьайыыга өссө 272 баһыылканы ыыттылар

Ааспыт нэдиэлэҕэ Саха сириттэн сылдьар байыаннай сулууспалаахтарга инники күөҥҥэ өссө 272 баһыылканы тириэртилэр диэн күннээҕи брифиҥҥэ анал байыаннай дьайыыга Саха сирин тирэх пууннарын сүрүн координатора Юстас иһитиннэрдэ.

“Бу сыыппаралар – көннөрү ыстатыыстыка буолбатахтар, байыастар умнуллубатахтарын туһунан билэллэрэ суолталаах, тыыннаах дьон устуоруйата” – диэн сүрүн координатор чопчулуур.

Отчуоттанар кэмҥэ тирэх пуун үлэһиттэрэ Донецкай уонна Луганскай өрөспүүбүлүкэлэр, Запорожскай, Херсонскай, Белгородскай, Курскай уобаластар 50-тан тахса нэһилиэнньэлээх пууннарын хабан 25 бара сырыттылар.

Тирэх пууннарга мэхээниктэр бөлөхтөрө байыаннай чаас 11 тиэхиньикэтин өрөмүөннээбиттэрин бэлиэтиир. Ону таһынан, былаан быһыытынан байыаннай чаастарга табаары, сыаналаах малы тириэрдии үлэтэ салҕанар.

Үлэ уонна социальнай сайдыы министиэристибэтин, Ыччат дьыалаларын уонна социальнай коммуникациялар министиэристибэтин исписэлиистэриттэн турар волонтердар “1602 Байыаннай клиническэй госпиталь” дьону приемнуур салаатыгар өрүү көмөнү оҥороллор.

Волонтердар бааһырбыт байыаннай сулууспалаахтарга бастакы психологическай көмөнү оҥороллор, ол иһигэр кинилэр дьиэ кэргэттэригэр сүбэ-ама биэрэллэр, маҥнай утаа ирдэнэр табаары ылыыга уонна докумуоннарын оҥотторууга көмөлөһөллөр.

Бу туһунан Ил Дархан уонна Бырабыыталыстыба пресс-сулууспата суруйар.