Саха сирин тустууктара Дагестаҥҥа Али Алиев турнирыгар кыттыахтара

Саха сирин сүүмэрдэммит хамаандатын тоҕус бөҕөһө ыам ыйын 17-19 күннэригэр Каспийскайга ыытыллыахтаах норуоттар икки ардыларынааҕы Али Алиев үбүлүөйдээх турнирыгар кыттыахтара.

Күрэхтэһиигэ аан дойду 14 дойдуттан, ону тэҥэ Арассыыйа эрэгийиэннэрин спортсменнара түмсүөхтэрэ. Ол туһунан «Триумф» успуорт киинигэр иһитиннэрдилэр. Саха сирин хамаандатын састаабыгар Любомир Ашеин, Петр Копылов, Федор Постников (57 кг), Петр Константинов (61 кг), Айсен Потапов, Олег Фомин, Станислав Свинобоев (70 кг), Андриан Ленский (86 кг) уонна Никита Хабаров (125 кг) киирдилэр. Дагестаҥҥа хамаанда тириэньэрдэрин быһыытынан Прокопий Петров уонна Василий Уваров барыахтара.

Саха сирин тустууктара манна бүтэһигин 2023 сыллаахха мэтээллэри ылары ситиспиттэрэ. Оччолорго саха спортсмена Андрей Бекренев (61 кг) боруонса мэтээл хаһаайынынан буолбута. Бу иннинэ 2021 сыллаахха Эдуард Григорьев үрүҥ көмүс призерунан, оттон Виктор Рассадин боруонса призерунан буолбуттара.