Саха сирин тыатын оскуолата Москваҕа ыытыллыбыт агропромышленнай быыстапкаҕа 5 мэтээли ылла

Бүтүн Арассыыйатааҕы “Көмүс күһүн” 26-с  агропромышленнай быыстапкаҕа, Г.П.Башарин аатынан Сылаҥ агро хайысхалаах орто оскуолатыгар оҥоһуллубут саха чэйин биэс көрүҥэ кыһыл көмүс мэтээлинэн наҕараадаланна.

“Бүтүн Арассыыйатааҕы быыстапкаҕа биһиги саха чэйин биэс көрүҥүн билиһиннэрдибит: «Нуурал», «Смородиновай», «Утренняя заря», «Богородица» уонна «Брусничный чай с мелиссой». Бу биһиги сайыҥҥы үлэбит түмүгэ буолар. Үүнээйини хомуйуу болдьоҕо уона технологията тутуһуллубут буолан, бородууксуйабыт олус хаачыстыбалаах, бары ирдэбилгэ эппиэттиир, ол иһин үрдүк баалы ыллыбыт. Быыстапкаҕа илдьиэхпит иннинэ лабаратыарыйа үс чинчийиитин ааспыппыт”, – диэн Сылаҥ орто оскуолатын дириэктэрэ Николай Дьяконов санаатын үллэстэр.

Ону тэҥэ, Уус Алдан улууһун агро хайысхалаах Суотту орто оскуолата бэйэтэ үүннэрбит оҕуруотун аһыттан оҥорбут икки көрүҥ бородууксуйата икки кыһыл көмүс мэтээлинэн уонна дьупулуомунан бэлиэтэннэ.

“Биһиги бородууксуйабыт бары ирдэбилинэн хаачыстыбаҕа сөп түбэһии сертификациятын, эспэртиисэни  ааһан, Арассыыйа таһымыгар тахсарын туһугар кыттыбыппыт. Биһиэхэ дойду атын эрэгийиэннэрин уопута уонна бастыҥ быраактыкалара суолталаах, ол иһин манна араас тэрээһиннэргэ сырыттыбыт”, – диэн Суотту орто оскуолатыттан быыстапка-дьаарбаҥкаҕа кыттыбыттар бэлиэтииллэр.

Бүтүн Арассыыйатааҕы “Көмүс күһүн” 26-с  агропромышленнай быыстапкаҕа агро хайысхалаах оскуолалары киллэрэн туран, өрөспүүбүлүкэ агропромышленнай комплекстарын 100-чэкэ бэрэстэбиитэллэрэ кытталлар.

Ил Дархан уонна Бырабыыталыстыба пресс-сулууспата.