Саха сирин учууталларыгар “РФ үтүөлээх учуутала” бочуоттаах ааты иҥэрдилэр

РФ Бэрэсидьиэнин ыйааҕынан үөрэҕи сайыннарыыга өҥөлөрүн уонна үгүс сыллаах үтүө суобастаах үлэлэрин иһин “РФ үтүөлээх учуутала” бочуоттаах ааты Любовь Ивановна Ефремоваҕа, Лидия Яковлевна Яковлеваҕа иҥэрдилэр.

Ефремова Любовь Ивановна — “Дьокуускай куорат” куораттааҕы уокурук В.П.Ларионов аатынан физика-тиэхиньиичэскэй лиссиэйин математикаҕа учуутала.

Любовь Ивановна үрдүк таһымнаах, педагогическай маастарыстыбалаах учуутал. Икки төгүл “Арассыыйа бастыҥ учуутала” (2007, 2012 с.) аатын ылбыта. Кини үөрэтэр оҕолорүн эксээмэҥҥэ түмүгэ хас да сыл бастыҥ көрдөрүүлээхтэр. Биир кэлим эксээмэҥҥэ математикаҕа (уустугурдуллубут) үөрэнээччилэрэ дойду уонна Саха сирин орто көрдөрүүтүн биллэ куоһараллар. Алта үөрэнээччитэ уустугурдуллубут математиканы 100 баалга туттарбыта. Биир кэлим эксээмэҥҥэ үрдүк көрдүүтүн иһин “Учуутал албан аата” кыһыл көмүс уонна “Учительский триумф” бэлиэлэринэн наҕараадаламмыта.  Кэлиҥҥи биэс сылга Бүтүн Арассыыйатааҕы үөрэнээччилэр олимпиадаларыгар сүүсчэкэ муниципальнай түһүмэх, сүүрбэттэн тахса эрэгийиэннээҕи түһүмэх кыайыылаахтарын, призердарын бэлэмнээтэ. Любовь Ивановна 2019 сылга педагогика эйгэтигэр М.А.Алексеев аатынан СӨ Судаарыстыбаннай бириэмийэтин лауреатынан буолбута.

Яковлева Лидия Яковлевна – Хаҥалас улууһун М.Е.Васильева аатынан 2-Малдьаҕар орто оскуолатын нуучча тылын уонна литэрэтиирэтин учуутала.

Лидия Яковлевна 48 сыл педагогическай ыстаастаах, үрдүк категориялаах, өрөспүүбүлүкэ нуучча тылын, литэрэтиирэтин биир сүрүн учууталларыттан биирдэстэринэн буолар. «За образцовое владение русским языком в профессиональной деятельности» нуучча тылын учууталларын Бүтүн Арассыыйатааҕы күрэһин, “Сердце отдаю детям” өрөспүүбүлүкэтээҕи күрэс “Кылаас бастыҥ салайааччыта” номинациятын, “Два языка — два крыла” өрөспүүбүлүкэ нуучча тылын, литэрэтиирэтин учууталларын күрэһин “Бастыҥ интегрированнай уруок” номинациятын кыайыылааҕынан буолар.

Үөрэнээччилэрэ үөрэххэ үрдүк интэриэстээхтэрин эксээмэҥҥэ түмүктэрэ туоһулуур. 2001-2020 сылларга кини үөрэнээччилэрэ 100 бырыһыан нуучча тылыгар эксээмэннэрин туттарбыттар, сүүрбэттэн тахса үөрэнээччитэ 70-80 баалы ылбыт. 26 үрүҥ уонна кыһыл көмүс мэтээлинэн бүтэрэр оҕону бэлэмнээһиҥҥэ тугунан да кэмнэммэт кылаатын киллэрбит өҥөлөөх. Бу туһунан Үөрэх уонна билим министиэристибэтин саайтыгар суруйаллар.