Саха сирин уһук дэриэбинэтигэр түргэн интэриниэт киирдэ

Өлөөн улууһун Дьэлиҥдэ сэлиэнньэтигэр соторутааҕыта түргэн интэриниэт киирэн, олохтоохтор үөрүүлэрэ улахан. Ол курдук, МегаФон 4G-интэриниэт холбонно.

Дьэлиҥдэҕэ 800-чэкэ киһи олорор. Бу иннинэ интэриниэтэ суох төлөпүөнүнэн көннөрү кэпсэтэр эбит буоллахтарына, билигин куйаар ситимигэр видеону көрөр, видеонан кэпсэтэр кыахтаммыттар. Нэһилиэк баһылыга Александр Егоров: “Эрдэ, биһиги сэлиэнньэбитигэр Билайн холбонон турбута эрээри, 4 G суоҕа. Аҕыйах хонуктан бэттэх МегаФон үлэҕэ киирэн, үөрүүбүт үрдээтэ. Нэһилиэнньэҕэ 400-чэкэ курдук босхо сим-каарталары ыыппыттарын түҥэттибит. Олохтоохтор бары кэриэтэ холбонон эрэллэр. Дьон туһанар, биһириир. Куйаар ситимигэр туох даҕаны уустуктары көрсүбэккэ киирэллэр, харбат. Видеонан сибээс эмиэ баар. Ыйдааҕы төлөбүрэ ханнык тарыыбы талалларыттан тутулуктаах, 500-2000 солк. диэри халбаҥныыр. Арай, лимиитэ суох тарыып суох эбит. Вай-файы эмиэ холботон эрэллэр. Дьиэнэн аахтахха 200-тэн тахса хаһаайыстыба баар. Олор бары кэриэтэ киллэттэрдилэр. Тэйиччи олорооччуларга эрэ суох, эһиил барыларыгар холбуур былааннаахтар”, — диэн санаатын үллэстэр.

Былырыын оптоволокно кэлэн, быйыл сайын лиинийэни тардан, күһүн дьиэлэргэ холботолообуттар. Инньэ гынан, улуус кииннэриттэн, куораттан туох даҕаны итэҕэһэ суох сибээс олохтоммут. Баһылык этэринэн, бу күннэргэ Дьэлиҥдэҕэ халлаан -40 кыраадыска диэри тиийэ тымныйа сылдьыбыт. Бүгүн -24 кыраадыс тымныы эбит. Куйаар ситимигэр холбонон, оскуола оҕолоро тымныы күннэргэ дьиэлэриттэн олорон үөрэнэллэригэр, туох да харгыһа суох кэпсэтэргэ усулуобуйа тэрилиннэ диэн этэр.

Хаартыска: СИАтан.