Саха сирин улуустарыгар олоҕу-дьаһаҕы хааччыйар таһаҕаһы тиэрдии түмүктэнэн эрэр

Бэҕэһээ СӨ Гражданскай оборуонаҕа уонна нэһилиэнньэҕэ куттал суох буолуутун хааччыйыыга миниистирэ Дмитрий Лепчиков салалтатынан таһаҕаһы тиэйиигэ суһал бөлөх уочараттаах мунньаҕа буолан ааста.

Мунньахха өрөспүүбүлүкэҕэ олоҕу-дьаһаҕы хааччыйар таһаҕаһы тиэйии бүтэһиктээх түһүмэҕэр тиийбитин иһитиннэрдилэр. Навигация саҕаланыаҕыттан өрөспүүбүлүкэ туһанарыгар 1 129,1 тыһ. туонна таһаҕас тиэйилиннэ эбэтэр ол былаантан 90,2% буолар. 1028,5 тыһ. туонна таһаҕас эбэтэр былаантан 82,2% тиэрдилиннэ. Индигиир уонна Халыма өрүстэринэн таһаҕаһы таһыы чугастааҕы күннэргэ түмүктэниэ, оттон Дьааҥы өрүһүнэн тиэрдии уруккутун курдук уустуктуктардааҕа бэлиэтэннэ.

«ЛОРП тэрилтэҕэ бу хайысханан чоҕу уонна ньиэби тиэйиини түргэтэтэргэ, оттон таһаҕаһы таһааччыларга хаалбыт таһаҕаһы тиийиэхтээх сиригэр тириэрдэри ураты хонтуруолга ыларга сорудахтанна. Таһаҕаһы тиэрдээччилэргэ суудуналары кыһыҥҥы турар сирдэрин кэмигэр сөптөөхтүк хааччыйалларыгар сорудахтанна», – диэн бэлиэтээтэ Дмитрий Лепчиков.