Саха сирин уолаттара көҥүл тустууга Арассыыйа чөмпүйэнээтиттэн 5 мэтээллэннилэр

Грознайга 21 саастарыгар диэри уолаттарга көҥүл тустууга Арассыыйаҕа бастыыр иһин күрэхтэһииттэн Саха сирин тустууктара биэс мэтээллэннилэр. 

61 киилэҕэ диэри ыйааһыҥҥа үс бастакы миэстэни Саха сириттэн сылдьар уолаттар ыллылар. Ол курдук, Андрей Мидловец бастаата, Артем Слепцов иккис, Эдуард Павлов үһүс буоллулар.

Оттон 79 киилэҕэ диэри ыйааһыҥҥа Роман Николаев үһүс миэстэ буолары ситистэ.

Итиэннэ бэҕэһээ Лев Павлов 57 киилэҕэ диэри ыйааһыҥҥа чөмпүйүөн үрдүк аатын ылбыта.

Эдэр тустууктары Ил Дархан Айсен Николаев телеграм-ханаалыгар эҕэрдэлээтэ: «Биһиги спортсменнарбыт дойду үрдүнэн Саха сирин тустууга оскуолата биир бастыҥ буоларын өссө төгүл дакаастаатылар. Спортсменнары, тириэньэрдэри уонна тустуу сүгүрүйээччилэрин ис сүрэхпиттэн эҕэрдэлиибин! Өссө улахан ситиһиилэр иннибитигэр турдахтара диэн эрэнэбин. Саха сирэ эһигинэн киэн туттар! Уруй-Айхал!»