Саха сирин уопутун Арассыыйа үрдүнэн тарҕатыахтара

Арассыыйатааҕы Киинэ пуондата кыра нэһилиэнньэлээх пууннарга киинэ тыйаатырдарын өйүүр куонкуруһу тэрийэр. Көмө федеральнай бүддьүөттэн барар. Бу бырайыак төрүөтүнэн «Экстра Синема» диэн саха исписэлиистэрэ оҥорбут технологиялара буолар.

Куонкуруска 50 тыһыынчаттан аҕыйах киһилээх сэлиэнньэлэр, бөһүөлэктэр кытталлар. Сэлиэнньэҕэ киинэ тыйаатыра суох буоллаҕына, кыттар кыахтаахтар. Сайаапканы 2025 сыл ыам ыйын 11 күнүгэр диэри биэриэххэ сөп. Кыайдахтарына, киинэ саалатын тэрийэргэ 3 мөлүйүөн солкуобайы ылыахтарын сөп. Сиһилии усулуобуйатын Киинэ пуондатын саайтыттан булуохха сөп  https://fond-kino.ru/.

2023 сыл ыам ыйыгар Саха сирин исписэлиистэрэ бэрэсидьиэҥҥэ «Экстра Синема» технологияны көрдөрбүттэрэ. Владимир Путин кинилэри өйөөбүтэ. Икки сыл иһигэр Саха сиригэр 72 киинэ саалатын арыйдылар, онон тыа сиригэр олорор  100 тыһыынчаттан тахса киһи киинэни улахан экраҥҥа көрөр, култуурунайдык сынньанар кыахтанна.

Билигин Саха сирин уопута Арассыыйаҕа тарҕанар. Бэрэсидьиэн Владимир Путин сорудаҕынан, «Экстра Синема» технологията «Дьиэ кэргэн» национальнай бырайыакка киирдэ. Бырайыак чэрчитинэн, Арассыыйа үрдүнэн кыра нэһилиэнньэлээх пууннарга киинэ саалаларын арыйыахтара. Ордук  суола-ииһэ суох Арктика сирдэригэр болҕомто ууруллар.

Ил Дархан, бырабыыталыстыба пресс-сулууспата.