Саха сирин устудьуоннара Москваҕа «Сыл устудьуона» национальнай бириэмийэ финалыгар кыайдылар

Ахсынньы 13-15 күннэригэр Москва куоракка «Твой Ход – 2025» Бүтүн Арассыыйатааҕы устудьуоннар пуорумнара ыытылларынан, «Сыл устудьуона»  национальнай бириэмийэ финала буолан ааста. Бу туһунан Саха сирин профессиональнай үөрэхтээһини сайыннарар институтун эрэдээксийэлиир-таһаарар киинэ иһитиннэрэр.

Бириэмийэ финалыгар дойду бары муннугуттан профессиональнай үөрэх тэрилтэлэриттэн уонна үрдүк үөрэх кыһаларыттан эрэгийиэннээҕи уонна кэтэхтэн түһүмэхтэр 850-тан тахса кыайыылаахтара муһуннулар. Үс күн устата кинилэр үөрэх, билим, успуорт, айар уонна уопсастыбаннай үлэҕэ ситиһиилэрин көрдөрдүлэр, 18 биирдиилээн уонна кэлэктиибинэн номинацияларга күрэхтэстилэр.

Биирдиилээн номинацияларга кыттааччылар бэйэлэрин билиһиннэрдилэр, оттон устудьуоннар кэлэктииптэрэ түмсүү сүрүн быраактыкатын туһунан кэпсээтилэр. Барыларыгар эбии түһүмэҕинэн дьыалабыай оонньуу уонна идэлэринэн тургутуулар буоллулар. Кыттыыны 70-тан тахса эспиэр сыаналаата. Күрэххэ Саха сириттэн биэс профессиональнай үөрэх тэрилтэтиттэн 11 устудьуон кытынна: И.И. Фадеев аатынан Үп-экэниэмикэ кэллиэһэ, С.Ф. Гоголев аатынан Дьокуускайдааҕы педагогическай кэллиэс, Жатайдааҕы тиэхиньикум, И.Е. Винокуров аатынан Намнааҕы педагогическай кэллиэм уонна Н.Г. Чернышевскай аатынан Бүлүүтээҕи профессиональнай-педагогическай кэллиэс. Кинилэр тоҕус номинацияҕа кыайыы иһин кииристилэр. Күрэх түмүгүнэн 90 кыайыылаах уонна лауреат аата билиннэ. Жатайдааҕы техникум «Сундуукчаан» айар мастарыскыайа (кыттааччылар – Маргарита Барановская, Семен Старостин уонна Полина Никитина) «Сыл айар кулууба» номинацияҕа лауреат аатын ылла. «Сыл күрэсчитэ» номинацияҕа кыайыыга дьулуурун иһин анал бирииһи И.Е. Винокуров аатынан Намнааҕы педагогическай кэллиэс устудьуона Ярослав Габышев ылла.