Саха сирин волонтердара байыаннай эпэрээссийэ зонатыгар 2 туонна гуманитарнай көмөнү ыыттылар

Бу күннэргэ Саха сирин тирэх территориальнай пуунугар 2 туонна гуманитарнай көмөнү ыыттылар.

Бу туһунан бүгүҥҥү брифиҥҥэ “Саха сирэ эйигин кытта!” уопсастыбаннай хамсааһын ыстаабын салайааччыта Айыл Дьулурҕа иһитиннэрдэ. Кини таһаҕаһы Москваҕа диэри тиэрдибит “Якутия” авиахампаанньа кэлэктиибигэр махталын биллэрдэ.

Саха сирин олохтоохторо байыаннай сулууспалаахтар ыыппыт сайаапкаларын учуоттаан саамай ирдэнэр маллары ыыттылар. Баһыылкаҕа сылаас таҥас-сап, аһылык, айаны тэрийэргэ ирдэнэр мал, эмп-том, өрөспүүбүлүкэ хаһыаттара уонна кинигэлэрэ бааллар.

“Саха сирэ эйигин кытта!” уопсастыбаннай хамсааһын гуманитарнай көмөнү тутар пууна Дьокуускай куорат, Орджоникидзе уул., 10-с нүөмэрдээх дьиэтигэр баар, өрөбүлэ суох күн аайы 10:00-19:00 чааска диэри үлэлиир.

Ил Дархан уонна Бырабыыталыстыба пресс-сулууспата.