Саха сирин волонтердара байыастарга гуманитарнай көмөнү ыыттылар

“Саха сирэ эйигин кытта!” уопсастыбаннай хамсааһын ыстааба Хабаровскай куоракка госпиталга эмтэнэ сытар байыастарга гуманитарнай көмөнү ыытта. Ону таһынан, волонтердарга байыастары көрөллөрүгэр диэн инбэлиит кириэһилэтин тиксэрдилэр. Ол туһунан брифиҥҥэ ыстаап салайааччыта Айыл Дьулурҕа иһитиннэрдэ.

Итиэннэ Саха сирин бырабыыталыстыбата байыаннай сулууспалаахтарга «Сокол» квадроцикллары ыыппыта. Тиэхиньикэни кытта «Саха сирэ эйигин кытта!» уопсастыбаннай хамсааһын хомуйбут гуманитарнай баһыылкалара барбыттара.

«Бу нэдиэлэҕэ баһыылка Ростов куоракка тиийиэҕэ. Салгыы ДНӨ-ҕэ баар тирэх пууннарыгар тиксэриллиэҕэ. Биһиги байыастарга эмп-том, таҥас-сап, күннээҕи туттар малы-салы, эбии тэрили уо.д.а. ыыттыбыт», — диэн Айыл Дьулурҕа бэлиэтээтэ.

“Саха сирэ эйигин кытта!” уопсастыбаннай хамсааһын ыстааба Дьокуускайга Орджоникидзе уул., 10  баар.

Үлэлиир кэмэ: 10.00 чаастан 19.00 чааска диэри.