Саха сирин үөрэҕин тэрилтэтин 80-тан тахса бырыһыана саҥа үөрэх дьылыгар бэлэм

Бүгүн, атырдьах ыйын 13 күнүгэр Бырабыыталыстыба бэрэссэдээтэлин бастакы солбуйааччы Дмитрий Садовников үөрэх дьылыгар бэлэмнэнии боппуруоһунан ыскаллаах быһыыны-майгыны сэрэтэр  уонна баһаартан куттал суох буолуутун хааччыйар хамыыһыйа мунньаҕын ыытта.

“Өрөспүүбүлүкэҕэ 1 290 үөрэх тэрилтэтэ баар. Саҥа үөрэх дьылыгар бэлэмнэнии 80% тэҥнэһэр. Атырдьах ыйын 20 күнүгэр эбийиэктэр бары бэлэм буолуохтаахтар. Итини сэргэ, кэккэ улуустарга хапытаалынай өрөмүөн уонна эбийиэктэри тутуу, ону тэҥэ, оттук кэмигэр бэлэмнэнии бүтэн эрэр. Үлэни барытын балаҕан ыйын 1 күнүгэр диэри бүтэриэхтээхтэр” – диэн Дмитрий Садовников бэлиэтээтэ.

СӨ ЫБММ кылаабынай управлениетын начаалынньыгын бастакы солбуйааччы Виталий Немцов былааны таһынан кэтээн көрүү, сэрэтэр сырыы, ону тэҥэ, борокуруор бэрэбиэркэтигэр исписэлиис быһыытынан кыттыы тэрээһиннэригэр баһаартан куттал суох буолуутун хааччыйыы 300-чэкэ ирдэбилэ кэһиллибитэ булуллубутун эттэ.

Бу туһунан Ил Дархан уонна Бырабыыталыстыба пресс-сулууспата иһитиннэрэр. Сиһилии манна ааҕыҥ.