Саха сирин үөрэх кыһалара «Знание» уопсастыба күрэҕэр кыттыстылар

Ыччат бэлиитикэтигэр уонна иитэр үлэҕэ үрдүк үөрэх кыһаларын хамаандаларын Бүтүн Арассыыйатааҕы күрэҕэр дойду 82 эрэгийиэниттэн 408 үөрэх кыһата 866 сайаапканы киллэрдэ. Ол иһигэр Саха сирин үс үрдүк үөрэҕин кыһатыттан 6 сайаапка киирдэ.

М.К. Аммосов аатынан Хотугулуу-Илиҥҥи федеральнай университет, Арктикатааҕы судаарыстыбаннай култуура уонна ускуустуба института уонна Чурапчытааҕы судаарыстыбаннай физкултуура уонна успуорт института, диэн www.sakha.gov.ru иһитиннэрэр.

Бырайыак «Знание» уопсастыба, РФ Наукатын уонна үрдүк үөрэхтээһинин министиэристибэтин кытта, Росмолодежь өйөбүлүнэн олоххо киллэриллэр.

Күрэх кыттыылаахтарыгар алта сүрүн номинация баар. Олортон сайаапка ахсаанынан саамай киэҥник тарҕаммыт үс бастыҥ номинациянан «Патриотическай иитии уонна Арассыыйа норуоттарын сомоҕолоһуута» (236), «Медиа уонна айымньы» (195) уонна «Успуорт уонна туризм» (170) буоллулар. Кинилэр кэннилэриттэн «Аһымал санаа уонна экология» (137), «Идэҕэ туһаайыы уонна выпускниктары кытта үлэ» (84) уонна «Эдэр ыал уонна социальнай эйгэ» (44) номинациялар кэлэллэр. Оттон «Сырадатар үлэ» уонна «Бастыҥ ыччат хамаандата» диэн анал номинациялар кыайыылаахтарын уопсай сайаапка ахсааныттан талаллар.

«Биһиги сайаапкалары тутан бүтэрдибит уонна бүгүҥҥү күҥҥэ университеттарга ыччат бэлиитикэтин уонна иитэр үлэни сайыннарыыга интэриэс дьиҥнээхтии үрдүгүн этэр кыахтаахпыт. Күрэх кыттыылаахтара кыайарга эрэ буолбакка, саҥа ньымалары киллэрэргэ, бастыҥ уопуттарын атастаһарга дьулуһалларын көрөбүт. Бары хамаандаларга кэлэр түһүмэхтэргэ ситиһиини баҕарабыт уонна ылбыт уопуттара, билиилэрэ кыттааччылар инники бырайыактарыгар көстүө диэн эрэнэбит», — диэн «Знание» уопсастыбатын генеральнай дириэктэрэ Максим Древаль бэлиэтээтэ.

Сайаапка ахсаанынан бастыҥ 10 эрэгийиэн иһигэр Москва (125), Санкт-Петербург (66), Башкортостан (30) уонна Татарстан (27) өрөспүүбүлүкэлэрэ, Новосибирскай (22), Тюмень (22), Волгоград (22), Саратов (21), Свердловскай (20), Нижнэй Новгород (19) уонна Ростов (19) уобаластара киирдилэр. Ону таһынан, күрэххэ Донецкай Народнай Өрөспүүбүлүкэтиттэн (10), Херсон уобалаһыттан (5) уонна Луганскай Народнай Өрөспүүбүлүкэтиттэн (3) сайаапка киллэрдилэр.

Сүрүн үөрэх кыһаларыттан 736 сайаапка киирдэ. Онтон баһыйар өттө – 355 сайаапка «9 000-тан кырата суох киһилээх контигеннаахтар» категорияҕа. «8 999-тан элбэҕэ суох уонна 4 000-тан кырата суох киһилээхтэр» категорияттан 239, оттон «3 999-тан элбэҕэ суох уонна 100-тэн кырата суох киһилээхтэр» категорияттан 142 сайаапка кэллэ. Филиаллар бэрэстэбиитэллэрэ икки категориянан 130 сайаапканы ыыттылар.